Merca a emiti alerta pa biahamento pa Aruba

Desde diamars dia 7 di augustus ultimo, Centers for Disease Control and Prevention (CDC) di Merca, a emiti un “Travel Health Notice” pa Aruba. A hisa e nivel di 1 te cu nivel # 2 debi cu, segun CDC, a raporta casonan di Zika na Aruba. Segun e comunicado di CDC, cu oficialnan di Directie Volksgezondheid di Aruba (DVG) a raporta cu sanguranan ta infecta cu Zika y ta transmitiendo e malesa aki bou di nos ciudadanonan. Lamentablemente nos na Aruba mes no ta na altura y na ningun momento DVG a informa comunidad di e desaroyo preocupante aki. Un rato pasa Vocero di DVG a sigura cu e no sa di nada y lo informa su superiornan pa mira di nan sa cu CDC ta alertando turistanan Mericano na estado pa NO biaha pa Aruba!

Den e comunicado di CDC ta alerta aerolineanan pa keda alerta di e situacion actual di salud publico na Aruba pa por spierta nan pasaheronan di cualkier paso adicional cu nan lo mester tuma pa proteha nan mes. Zika ta un menasa serio pa hende muhe na estado of hende muhe cu tin pensa di sali na estado den e siguiente simannan.

Minister di Turismo, Salud Publico y Deporte, Dangui Oduber, te ainda no a emiti un comunicado tampoco pa informa comunidad di Aruba riba presencia di sanguranan infecta cu Zika bulando rond riba nos isla. E tipo di informacion aki mester sali mesora pa pueblo por prepara y uza repelente na tur momento y evita pica di e sanguranan Aedes Aegypti, conoci na Aruba pa ta transmiti e malesanan Dengue, Zika y Chikungunya.

Aruba Tourism Authority tampoco no ta na altura di e desaroyo aki y a keda di check internamente si via nan rednan por a haya e informacion aki di cual biaheronan awor lo pensa dos biaha prome cu subi avion pa nos isla. Specialmente pasobra Aruba ta un destinacion di “honeymooners” di cual hopi biaha ta e hende muhe por sali na estado. E tipo di informacionnan asina, esta di presencia di Zika, sin duda no ta alentador pa atrae e mercado aki pa nos isla.

Den caso di Zika, e personanan mas vulnerabel ta hende muhe na estado. Tur hende por haya Zika y su sintomanan ta masha limita y 4 di 5 hende no sa mes cu nan ta infecta cu Zika. E problema grandi ta e hende muhenan na estado cu por infecta via sangura of via relacion sexual cu un partner infecta y asina pasa e malesa over na e feto.

E baby lo nace cu un problema di salud serio, entre otro Microcephaly, den cual e cabes di e baby ta mas chikito cu normal debi cu nan celebro ta crece mas chikito cu normal debi cu e no a desaroya di forma apropia.

Comments

comments