E vacuna di e compania biotecnologico Moderna contra COVID-19 ta un cu por bini riba mercado na final di e aña’ki, segun un anuncio haci door di Gobierno Mericano dialuna ultimo. E anuncio aki a bini despues cu e fabricante di remedi a anuncia inicio di fase 3 di testnan pa demostra cu e vacuna ta uno sigur y efectivo, cu ta e obstaculo final prome cu autoridadnan concerni duna aprobacion pa produccion na escala mundial.
E test aki ta e prome estudio di e tipo aki cu a yega na un etapa asina avansa bou di e programa di Gobernacion di Trump, y cu ta busca pa acelera desaroyo di medidanan contra e coronavirus nobo, loke ta trece un speransa mas pa un vacuna efectivo cu ta yuda finalisa e pandemia.
Moderna a ricibi casi mil miyon dollar for di Gobierno di Merca. E fondonan ta yuda financia varios posibel vacuna.
Na e momentonan aki rond mundo di tin 150 candidato pa vacuna contra coronavirus cu ta den diferente fase di desaroyo, mientras cu mas cu 20 a pasa caba pa testnan riba sernan humano.
“Logra haya un vacuna sigur y efectivo pa distribucion prome cu final di 2020 ta un meta dificil, pero ta e meta corecto pa e pueblo Mericano,” director di Instituto Nacional di Salud (NIH), Francis Collins, a bisa den un declaracion manda pa prensa.
Moderno por tin algun shen miyon dosis cla ora y si e vacuna wordo considera sigur y efectivo, Collins a bisa.
Anthony Fauci, principal experto den malesanan infeccioso di e pais, a bisa cu e conclusionnan riba e efectividad di loke ta e prome vacuna Mericano probablemente lo yega na november of december.
“E ta un record mundial pa nos di a logra pasa e secuencianan (di e virus SARS- CoV-2) pa fase 3 di un vacuna den asina poco tempo. E ta algo cu nunca antes a haci,” Fauci a splica. El a sigura tambe cu e proceso, cu a tuma solamente 6 luna, no a compromete e rigor cientifico ni e siguridad di e testnan.
