MEP y POR preparando pa campaña

Aunke cu eleccion oficialmente ta na september 2021, pues aki dos aña y cu normal campaña ta start 6 luna prome, toch e biaha aki ta nota movecionnan politico di awo caba. Esey por nifica tres cos; Sea cu coalicion sa cu nan lo benta Gobierno abou den e proximo simannan – Of esun kier pone presion riba e otro – Of nan kier cuminsa hopi trempan e biaha aki cu preparacionnan rond di campaña electoral. Claro cu cada persona por saca su mesun conclusion riba e situacion politico cu e coalicion MEP-POR-RED ta den actualmente.

E prome salida tabata diasabra merdia di e partido politico POR. Nan a tene un reunion den Paradijswijk, cu bandera y tur. Riba red social por a mira con e DJ tabata papia di ban eleccion, etc. A menciona cu ta preparando pa anuncia candidatonan nobo, etc. Riba e video a nota lider di partido, Otmar Oduber, cortando bolo memey di algun militante conoci di e partido politico.

Mientras cu di un banda POR a sali “mustra forsa” un rato despues partido MEP tambe a sali afo pa contesta. Ey e lider di Partido MEP, mr. Evelyn Wever-Croes a yama algun militante pa un reunion cu el a considera di “strategia” pa campaña 2021. Ta straño cu ta start e parti aki di strategia desde aña 2019 caba si. A mira entre otro Parlamentario Roco Tjon den e reunion, hunto cu algun coordinador di Gobierno.

Na final por conclui cu tanto POR como tambe MEP a sali midi forsa un rato riba con cada un, individualmente, ta preparando pa eleccion aki dos aña. Di otro banda RED ta manteniendo un postura di silencio, aunke cu na mas di un ocasion a yega di menasa MEP y POR cu si kier saca nan di coalicion, cu “so be it”.

Mesun candidatonan prominente di MEP a cuminsa corda liderazgo di nan mesun partido kico falta pa haci ainda. Probablemente teniendo cuenta cu mita di e periodo di gobernacion a pasa caba y si bin un posibel kiebro den coalicion, con lo bay “bende” e mesun promesanan cu nunca a cumpli cune!

Partido AVP a cuminsa organisa reunionnan tras di otro na nan Cas di Partido, den bario of cerca votadonan. Di e forma aki e partido, cu den ultimo eleccion dos aña pasa a cay di 13 asiento pa 9 asiento, ta purba recobra e votonan “perdi”. Un di nan slogannan hopi scucha ta cu e coalicion MEP-POR-RED a engaña votadonan dos aña pasa, cu nan conoce e situacion financiero di nos pais y cu nan lo drech’e sin tuma medida. E tempo ey a priminti di baha e cantidad di Ministernan, pero pa por a forma coalicion no a logra. Di otro banda a papia di reduci coordinadornan, mientras cu por mira cu nan gastonan di personal a subi barbaramente compara cu loke AVP a bay lage. Riba dje, MEP a perde eleccion na 2009 pa via di “Friends & Family” y ta parce cu nan no ta siña di esaki y a bolbe yena e aparato cu famia y amigonan, creando rabia y disgusto bou di nan propio “hendenan”.

E lista aki ta indica e candidatonan cu mas a crece y mas a cay den eleccion 2017. E politico cu den porcentahe a crece mas tabata Ricardo Croes di RED mientras cu esun cu a cay mas tabata Marisol Lopez di POR. Generalmente por mira cu entre esunnan cu a cay mas den voto ta precisamente candidatonan di POR, esta Otmar Oduber, Andin Bikker y Marisol Lopez. Esunnan cu den porcentahe a crece mas tabata Ricardo Croes (RED), Dangui Oduber (MEP) y Xiomara Maduro (MEP). E tres candidatonan cu mas voto na Aruba ta keda Mike Eman (AVP), Evelyn Wever (MEP) y Ricardo Croes (RED).

Cu e tres partidonan mas grandi, AVP, MEP y POR awor den pleno campaña ta crea e impresion cu eleccion ta na caminda. Aunke cu politicamente e lo por cumbini esun “miho para” entre e partidonan, toch e realidad economico di nos pais awor lo no duna pa un bon campaña. Pasobra, na final, na Aruba….eleccion ta placa. Y si no tin placa, no tin campaña y sin campaña, resultado di eleccion ta keda un reto.

Noticia relacionaMas for di e autor