MEP: Un manifestacion cu un señal fuerte pa Mike Eman

E realidad amargo pa Mike Eman ta cu awe el a haya un señal fuerte di pueblo di Aruba, caminda nan a bis’e cu nan no por wordo manipula mas. Un ex-lider di partido AVP cu den e ultimo eleccion a haya riba 7000 voto, no por a pone ni 250 hende riba pia, incluyendo candidato di AVP y ex-coordinadornan, asina lider di Fraccion di MEP den Parlamento, Rocco Tjon, a duna di conoce den un comunicado di prensa.

Awe a tuma luga un manifestacion orkestra pa partido AVP. Supuestamente e meta di e manifestacion aki tawata pa Mike Eman haya sa e fecha nobo di eleccion. En realidad Mike Eman kier a midi su credibilidad y popularidad den pueblo pa wak si e por haya un chens mas pa sigui cu practicanan di mal gobernacion. Pasobra manera nos tur sa na 2014 Mike Eman a haya un “koninklijk besluit” pa “ondeugdelijk bestuur” (mal gobernacion), asina MEP a informa.

MENSAHE DI PROME MINISTER EVELYN WEVER-CROES

Apesar cu Mike Eman su manifestacion ta uno inhustifica y incomprendibel, Minister President Evelyn Wever-Croes a demostra respet pa nos estado di derecho y a otorga un permiso pa Mike Eman por expresa su mes.

Respetando asina e derecho constitucional di cada ciudadano. Minister President sra. Evelyn Wever-Croes prome cu e manifestacion a haci un yamada na cada ciudadano pa respeta manifestadornan y duna nan espacio pa expresa nan mes. Un mensahe di union y respet pa nos democracia.

MENSAHE DI EX-SOSTENEDONAN DI AVP PA MIKE EMAN

Awe un señal fuerte a wordo manda pa Mike Eman. E sosten cu el a conoce na 2017, caminda 7000 persona a vota p’e a transforma den uno caminda solamente 250 persona a acudi na su yamada pa e “marcha nacional”. Pueblo su wowo a habri y ta compronde awo dicon Mike Eman a haya un Koninklijk Besluit na 2014 pa “ondeugdelijk bestuur” (mal gobernacion).

Nan ta compronde awo cu Mike Eman a malgasta fondo publico sin responsabilisa su mes pa esaki, manera ta indica den e cuenta anual di Algemene Rekenkamer. Nan ta comprende awo cu e mal gobernacion y falta di liderazgo di Mike Eman a conduci cu pais Aruba tin un debe gigantesco pa paga.

Y sigur un señal fuerte a wordo manda cu fechoria manera a tuma lugar den Lotto Pa Deporte, Utilities, Tereno-gate, Hedging y proyectonan fantasma manera menciona den rapport di Algemene Rekenkamer, no lo wordo acepta mas. Y pueblo a condena ayera fuertemente cu Mike Eman algun luna atras a falsifica informacion di Centrale Bank van Aruba y purba di manipula pueblo door di mal usa e logo di Central Bank van Aruba, asina Rocco Tjon a duna di conoce.

PA CONCLUI

Ta di spera awo cu Mike Eman acepta e mensahe aki y respeta resultado di eleccion 2017. Ta un momento pa Mike Eman reflexiona y mustra mesun respet, grandesa y liderazgo cu Eveyn Wever-croes a mustra.

“Por ultimo mi ta haci un apelacion na oposicion pa presenta na trabou y traha na bienestar di pais Aruba. Ban uni manera Evelyn Wever Croes a urgi pueblo awe. Y laga practicanan pa segrega nos pueblo y crea desunion, manera Mike Eman ta boga p’e ta pa pasado”, asina Rocco Tjon a termina bisando.