A tuma luga e clausura di Aña Parlamentario 2020-2021 y durante e reunion publico mr. Evelyn Wever-Croes a desea tur parlamentario exito p’e siguiente Aña Parlamentario. El a comparti 3 deseo cu e tin pa e Parlamento nobo. Ya caba a pone e fundeshi den parlamento di aña 2020-2021 y su deseo ta p’esey continua den Aña Parlamentario nobo.
INDEPENDISACION DI NOS PARLAMENTO
E prome deseo ta un Parlamento fuerte. Pa finalisa cu e plan di independisacion di parlamento den e aña Parlamentario nobo nos dilanti na e modelo cu Parlamento ta scoge p’e, pero un Parlamento fuerte cu por bringa cabes na e retonan cu Aruba ta enfrentando. E esfuersonan haci pa logra independisa e organo y e deseo ta pa pronto esaki por ta realisa.
CRISTALISA OMBUDSMAN
E di dos deseo ta di mira e ombudsman cristalisa. A cuminsa cu esaki pero lamentablemente pa algun diferencia di opinion no por a keda cla cu esaki. Prome Minister ta expresa su confiansa cu e parlamento aki, cu a demostra cu ta esun cu a bin cu e iniciativa pa bin cu un ombudsman, unanimamente lo acepta e ley di Ombudsman. Aworaki ta na e momento crucial di demostra cu nos ta kere den un Ombudsman, ancra den constitucion.
“Ohala cu nos por pone nos diferencianan un banda y logra cu esaki por pasa y asina duna pueblo loke pueblo ta pidi di e Parlamento aki, esta pa e Ombudsman por ta ancra den nos constitucion y pa e por funciona como defensor di pueblo”.
MANTENE REGLA DI INTEGRIDAD HALTO
E di tres deseo grandi ta pa Parlamento aki mantene e reglanan di integridad asina na halto. A papia hopi di dje, tin un ley di integridad cu ta den tratamento y ohala cu hopi trempan den e aña parlamentario nobo, e ley aki por pasa pasobra pueblo kier esaki. Pueblo ta pidi pa tin regla pa asina por atene su gobernantenan y Parlamentarionan na nan.
“Si e ley aki pasa, tur Parlamentario cu ta bou di investigacion actualmente lo tin cu bandona nan funcion na e momentonan aki anto e ora ey porfin por hala rosea akiden y bisa cu e Parlamento berdad ta para pa reglanan di integridad”.
Prome Minister a termina deseando cada Parlamentario exito den e aña Parlamentario 2021-2022 y cu e 3 deseonan aki biba tambe den curason di cada Parlamentario pa asina nos pueblo por conta cu un Parlamento cu ta digno di confiansa di un y tur.
