MEP ta sigura cu nan a prepara bon pa Presupuesto 2018

293

Despues cu Gabinete Mike Eman no a entrega presupuesto 2018 na tempo, esta dia 1 di September 2017, a causa cu mester a warda te ora cu e gabinete nobo sinta pa cumpli cu e tarea aki. Porfin ta asina leu cu awe a cuminsa tratamento di e presupuesto 2018 den Parlamento.

Fraccion di MEP, un fraccion di cual practicamente tur su miembronan ta nobo den e encargo aki, for di inicio caba a tuma henter e procedura pa trata presupuesto 2018 hopi na serio y den cuadro di esaki a haci un gran cantidad di pregunta, alrededor di 2000 pregunta na Ministernan di Gabinete Wever-Croes, asina nan mes ta skirbi den nan comunicado. Fraccion di MEP a demostra tambe di ta para critico den nan rol di controla gobierno manera nos constitucion ta prescribi. E preguntanan haci tabata hopi alcaso y conciso y semper teniendo na cuenta e bienestar di nos conciudadanonan, segun e Parlamentarionan ta bisa.

Tur e miembronan di fraccion di MEP a traha hopi duro, tanto den siman como den fin di siman, pa scrutina e presupuesto den forma eficiente, mirando e hecho cu e preguntanan mester a ser entrega na tempo na gobierno y p’asina presupuesto 2018 por a sigui su trayectoria, teniendo na cuenta cu e presupuesto mester haya su aprobacion prome cu fin di april 2018.

Pa e reunion di Parlamento di e siman aki y otro siman, henter fraccion di MEP ta bon prepara y tur miembro di fraccion cu nan respectivo experticionan lo sa di hiba un bon debate, eficiente y profesional manera cu pueblo ta spera di su Parlamentarionan.