“Ainda mi ta tende cu Ringeling tin rosea den AZV!”, asina Dr. Arthur Vallego, Consehero principal di Minister di Turismo, Salubridad Publico y Deporte, Dangui Oduber, a duna di conoce awe riba su pagina di Facebook. E candidato di MEP, kende a enfoca hopi riba salud publico den campaña a bisa cu “September ta pasando y nos kier mira e cambio den nos “Aseguradora” nacional di Salud!”
Mas leu e dentista/politico a splica cu “Tin hopi pa haci den AZV y Mr. Goedhoop tin un trabou monumental pa cual tin tur mi respet como tambe apoyo. Si e mester por tuma contact cumi libremente”, segun Arthur Vallego.
“Nos kier wak un director humano, nos kier wak auditoria di tur loke ta wordo haci den institucionnan Medico den exterior y pa esaki mester upgrade AZV su departamento di conseho y revision di caso medico na Aruba”.
E palabra clave ta cu AZV mester tin un “Doliente”. Un persona unda cu 35 miyon bayendo pa incremento di 50 miyon den 4-5 aña ta haci dolor y ta haci cambionan cu por baha e tendencia aki di incremento di gasto! Den beneficio di pais Aruba pasobra den tur otro caso tabata facil. Esaki tabata hisa e BAZV pa Pueblo por cubri e gasto.
“Mi kier wak un Director cu ta viaha pa Cali, Bogota, Medellin y Bucaramanga pa puntra conta cu e trato y Salud di nos ciudadanonan. Kico nos por mehora y kico nos por cambia pa disminui costo. Negocia manera mester ta cu e clincanan aki cu ta institucionnan di negoshi y drecha e tal cartel di negoshi cu tin di e Frontdesknan intenacional di clinica cu hotelnan den area di clinica. Hendenan cu ta bay pero mester warda 1 siman na Bogota, Cali, etc. pa cita medico. Tur esaki ta gasto na unda nos por spaar na beneficio di Aruba voraal awor den tempo economico fragil!”, segun Dr. Arturo Vallego.
El a termina cu un mensahe pa tur envolvi den haci cambio, probablemente Minister Dangui Oduber mes y Ruben Goedhoop di AZV bisando: #MATAHA.
Dr. Artur Vallego a subi lista di partido MEP den eleccion di September 2017. El a profila su mes como e candidato pa salud publico di e partido. No obstante su edad hoben, e hecho cu su tata tin hopi aña practicando medicina na Aruba y ta un ex-politico, lo mester a traduci su mes den voto pa e yiu. A dun’e e posicion di honor, number # 29 riba e lista y a logra no menos di 972 voto. E ta di 6 votegetter di MEP den ultimo eleccion, hayando mas voto cu mayoria di e Parlamentarionan den Fraccion di MEP. Asina mes a opta pa laga e hoben politico for di Parlamento y a ofrece un trabou di consehero.
