Evelyn Wever-Croes a tene su reunion cu Gobernador, despues cu e resultado di e eleccion a tuma luga. El a menciona cu e combersacionnan cu Gobernador, ta pa no divulga e contenido. Loke ta importante pa bisa ta cu e kier a sa di nan con ta nan ta para, kico ta nan posicion y punto di bista con ta mira henter e resultado di eleccion. A splik’e manera cu a bisa durante entrevista cu e partido prome yama pa purba di forma ta partido AVP, door cu ta partido mas grandi y si berdad partido AVP no asumi su responsabilidad, e ora MEP no tin ningun problema pa asumi’e.Despues a bin e di dos punto cual ta kico ta e partidonan cu por of kier traha, cual ta e preferencianan. A splike un biaha mas cu pa MEP ta importante pa tin un base mas amplio posibel. Den campaña a hib’e cu por forma cu cualkier partido, pasobra no tin diferencianan asina grandi cu e diferente partidonan. En principio, cu excepcion cu partido AVP y esey pasobra ora cu mira kico AVP ta para p’e y kico MEP ta para p’e, tin un diferencia sumamente grandi.
Esaki ta e informacion cu a laga atras. Tin di compronde mientras tanto cu por ta partido AVP si ta mira cu nan por traha cu MEP, cual Wever-Croes kier sa con esey lo bay ta.
Awor aki a duna e informacion aki y Gobernador ta haciendo su sondeo pa despues dicidi kico ta bay pasa.
AVP ta lag’e pa un otro informador
Gobernador a notifica e lider di MEP hopi cos, pero e no tabata den libertad pa papia di nan. Tin cu warda e proceso tuma luga. Ta un momento unico pa Aruba. Prome biaha den 16 aña tin e situacion di tin cu bay negosha un Gobierno pa yega na un coalicion. Mester duna tur hende e espacio. Tin cu corda tambe cu pa ley, tin e Parlamento cu tin awo, ta sinta te fin te otro luna. Despues di esaki, no por baha e parlamento prome. E Parlamento ta legitimamente eynan y e Gobierno tambe. No tin ansha, no tin pura.
Pa dia 27 di October tin tempo pa yega na un coalicion. Importante ta pa e ta algo bon y algo solido. Aruba no mester awor aki di algo instabil. Awor aki mester di un Gobierno stabil.
No tin instruccion ainda
No tin instruccion ainda. Wever-Croes tin su opinion. Gobernador tambe a haci pregunta riba nan puntonan di prioridad, kico pa MEP ta hopi importante. Manera cu a bisa durante henter campaña, pa tin un Gobierno integro, pa combati corupcion y di dos ta pa trece e ordo na e situacion financiero di pais Aruba. Tanten cu bo no tin ordo na e situacion financiero, bo no por inverti den haci Aruba mas sigur, den desaroyo di economia pa crea empleo, den cuido y salud, den enseñansa. E dos pilarnan importante ta combatimento di corupcion y e tema financiero di pais Aruba.
Den e tema financiero di pais Aruba, manera cu a bisa semper, cu mester baha gasto di Gobierno y cuminsa di ariba prome cu pensa di bay pidi pueblo pa entrega of pa baha gasto di servicio pa e pueblo. Tin cu cuminsa ariba. Eseynan ta e temanan cu mas tanto a trece padilanti na Gobernador.
