MEP: Mike de Meza ta nervioso pa movecionnan positivo den refineria

722

“Recientemente por a lesa un comunicado di parlamentario Mike de Meza unda e ta mustra nervioso pero tambe ta duna muestra di desesperacion. Na manera infunda ta trata na crea polemica. E ta purba descredita Gobierno cu den tempo di crisis ta haciendo lo maximo pa por crea cupo di trabou y sigur entrada pa pais Aruba na trata na crea diferente pilarnan economico”, asina Edgard Vrolijk, miembro di Parlamento pa Fraccion di MEP a duna di conoce.

“Parlamentario Mike de Meza den su desesperacion kier bin crea storianan unda cu tin movecionan pa benificia amigonan y unda hasta ta insinua cu hasta FMSA lo ser traspasa pa hendennan liga na gobierno”, di acuerdo cu e miembro di Parlamento.

Na prome lugar ta califica tur trabou den refineria como “essential business” mescos cu Elmar y WEB pa percura pa tur cos ta cana bon pa suministro di fueloil pa por genera awa y coriente pa pueblo y e movecion aki a haci Parlamentario de Meza nervioso. Dia 15 di mei cu a pasa a publica anuncio di interesadonan pa huur di tankinan. Hopi grupo a expresa nan interes y awo ta den e proceso di screening p’asina pronto por presenta na un manera transparente e grupo cu lo huur e tankinan.

Pa locual ta e proceso di refineria lo ser encamina 3 trayecto simultaniamente;
⁃ Busca operador nobo
⁃ Busca inversionista den un otro industria relaciona cu refineria, por ehempel LNG
⁃ Busca inversionista pa un industria nobo

E trayectonan aki mester tene cuenta cu e siguiente exigencianan; mester percura pa cubo ekivalente na un refineria, cumpli cu exigencianan di medio ambiente y por cumpli su ‘fairshare’ pa gobierno. E luna aki e lo encamina e proceso aki di expresion di interesadonan p’asina evalua e propocion di esnan interesa.

“Sigur ora pueblo wak Gobierno ta encaminando un proceso transparente y sigur uno cu pueblo lo sali faboresi. No manera ta e practica di pasado unda cu amigonan tabata haya y tambe sigur nos no kier wak pasa mas locual a pasa den e proceso di CITGO unda cu a crea
speransa falso y unda cu na final di dia pueblo di Aruba a sali perdi”, tabata palabranan di Parlamentario Edgard Vrolijk.

“Mi ta hopi positivo cu banda di nos por huur nos tankinan cu nos tin para desde 2016 y cu por genera algun miyon florin den temponan dificil aki y sigur mirando e interes pa inversionnan den industria nobo ya expresa cu prome cu fin di aña nos por cera un aña dificil pero cu
speransa su cu 2021 por habri positivo. Hendenan negativo manera AVP y parlamentario Mike de Meza Aruba no mester mas paso nos Gobierno y nos Prome Minister ta trahando cu alma y cuerpo pa por diversifica nos economia pero sigur crea entrada y cupo di trabou pa Aruba”, asina Edgard Vrolijk a termina bisando.