Dialuna awo Parlamento lo reuni cu representantenan di Sindicato di Polis (SPA) den comishon fiho di asuntonan hudicial, asina Lider di Fraccion di MEP y alabes Presidente di dicho comision, esta Rocco Tjon, a informa awe. Ta parce cu e cantidad di Polisnan cu a protesta algun dia pasa pa indexering y cu ta rabia riba un lista di otro asuntonan mas, awor tin atencion special di e ex Altoinspector, cu awor ta Parlamentario. Sinembargo, e reunion lo ta cu e comision completo, den cual ta incluo tambe Ricardo Croes di RED, cu desde algun dia caba tin yabi di coalicion den su saco, despues cu MEP a baha di 9 pa 8 asiento den Parlamento.
Rocco Tjon a informa cu e topico di agenda lo ta e desaroyonan actual den husticia. A base regular ta reuni cu diferente “stakeholders” den e cadena hudicial.
OVERTIME Y A.O.
Manera ta conoci recientemente e colegio di supervision (CAft) a emiti un rapport den cual ta señala cu “overtime” ta halto den e departamentonan hudicial, manera entre otro Cuerpo Policial. MEP lo kier intercambia di idea cu Sindicato di Polis con nan ta mira e aspecto aki.
CANNABIS MEDICINAL
Tambe MEP a tuma nota di un declaracion di e presidente di e sindicato, Joselito Dirksz, den cual e ta vocifera su preocupacion pa loke ta cannabis medicinal y e trayecto di legalisacion. “Mi ta hay’e sumamente importante pa scucha e preocupacion di e sindicato pa nos por tene cuenta cu e aspectonan cu nan lo elabora riba dje”, asina Rocco Tjon a duna di conoce. Cuanto espacio e tin pa tene cuenta cune, no ta conoci, pasobra e coalicion MEP-POR-RED a conveni den e acuerdo di gobernacion cu lo legalisa marihuana na Aruba, por lo menos e uzo medicinal. Pero awor ta papia di cultivo tambe, cu ta cambia henter e panorama y riba dje kier duna licensia na balor di 10 miyon florin otro aña, pa companian por explota e negoshi aki den zona franca y exporta pa otro paisnan unda ya marihuana ta legal.
PA CONCLUI
Mescos cu den pasado MEP a sinta na mesa pa yega na otro, manera tawata e caso riba protocol di RST, esaki no lo ta diferente. “Lo nos tene pueblo informa di resultado di e reunion”, asina Rocco Tjon a finalisa bisando.
