MEP kier escudo y POR kier shoco

Desde Juni 2015, Parlamento di Aruba, bou Presidencia di drs. Marisol Lopez-Tromp y cu sosten unanime, a acepta nan simbolo (logo) nobo, cu a bira e shoco. Meta di e simbolo ta pa Parlamento por ta independiente di Gobierno y pa tin su propio identidad y imagen. Pero, despues di dos aña awor tin discusion cu si ta laga e logo di Shoco den Parlamento of ta pone e escudo bek. Esaki awor a bira un diferencia di opinion den e coalicion MEP-POR-RED.

Recientemente, durante un reunion di e “Commissie Huishoudelijk Aangelegenheden” di Parlamento, den cual ta sinta e Presidente di Parlamento y e 4 lidernan di fraccion di AVP, MEP, POR y RED, a discuti e tema aki den forma amplio. Pero, no a logra sali di e impasse pasobra “mayoria” den coalicion ta na fabor di e simbolo nobo, esta e Shoco.

E lider di fraccion di MEP den Parlamento, Rocco Tjon a presenta e tema riba mesa y ta pidi pa saca e Shoco for di Sala di Parlamento y pone e escudo bek. MEP desde September 2015 a keha di e cambio di logo caba. Nan a bisa e tempo ey cu a vota na fabor pa complace cu deseo di e Presidente e tempo ey, Marisol Lopez-Tromp, pero hamas tabata nan intencion pa saca nos escudo nacional for di den sala. MEP tabata sinti cu e Presidente e bay “di mas” cu e asunto di logo aki.

Awor cu MEP ta den Gobierno, a presenta e punto aki pa den CHA, e organo cu ta dirigi Parlamento, pa nan haci e cambionan necesario. Pero MEP no a conta cu su partnernan lo lage cay den e decision aki, specialmente pasobra e mesun Marisol Lopez-Tromp tambe ta den CHA, como Lider di Fraccion di POR. El a splica su mes bon y cu argumentonan valido a defende su decision di 2015 relaciona cu e cambio di simbolo como imagen di Parlamento. Na dado momento, Ricardo Croes, Lider di Fraccion di RED a vocifera cu e tambe ta na fabor di e Shoco y ta uni na e Fraccion di POR den e discusion aki. MEP a keda para su so y a bira wak Marlon Sneek di AVP pa busca sosten, riba cual AVP a indica di no a fiha un posicion ainda pero sigur no kier mete den pleito entre e coalicion MEP-POR-RED.

Cu esaki ta bisto cu un tema, cu de facto no tin tanto importancia banda di tur e retonan cu nos pais ta enfrentando riba tereno financiero, di husticia, social, economico, relacion den Reino, retonan petrolero pa cu PDVSA y CITGO, cu Parlamento ta dedica tanto atencion asina na cambia logo den sala!

Parlamento di Aruba ta existi desde di 1986 y ta canando un trayecto avansa pa ta mas independiente for di Gobierno. Den e cuadro ey a dicidi pa no uza e escudo mas como nan imagen, pasobra esey Gobierno ta uza caba.

Parlamento ta uza awor e simbolo di e shoco. E strea riba e frenta di e shoco ta representa tur e nacionalidadnan cu tin riba nos pais y cu ta forma e comunidad di Aruba y cual ta e comunidad cu e Parlamentarionan ta para p’e y mester representa. Un shoco tin e abilidad pa mira den scuridad y ta spera cu e Parlamentarionan lo sa di mira door di tur sorto di scuridad kico ta e caminda cu nan mester tuma. Tambe e wowonan geel ta representa nos solo. E shoco ta un parha cu ta para firme riba suela y aki a pone e shoco mei mei di e aloenan. E color di oro ta representa e balor di nos Parlamento y e 21 plumanan ta e 21 parlamentarionan cu ta representa nos pais.

Problema cu “Shoco” den Parlamento

Posted by 24ora on Friday, December 1, 2017