E siman aki ta tumando luga e encuentronan Interparlamentario di Reino Hulandes. Debi na e restriccion di biahe, e encuentronan aki a sigui pero via di sistema di internet. Den media Hulandes por a lesa cu riba e prome dia, lider di e delegacion di Aruba, Rocco Tjon (MEP) a declara cu e situacion na Aruba ta hopi penoso, unda cu desempleo a aumenta drasticamente a consecuencia di cierre di frontera door di crisis di COVID-19.
Rocco Tjon a bisa na momento cu el a hiba palabra cu e datonan mas actual di desempleo ta indica cu esaki a subi pa 77% mientras cu prome cu e crisis di COVID-19 e tabata 7,3%. Y na mesun momento el a haya chens pa reacciona riba un comentario di Secretario di Estado Raymond Knops, kende a bisa prome cu henter e crisis cu e islanan no por carga nan autonomia. Den e presentacion por scucha e Parlamentario di Aruba ta bisa cu e expresion aki no ta na su luga, incorecto y contra tur etica, pasobra “Aruba a cumpli cu tur e palabracionnan di presupuesto”.
Naturalmente el a haci un apelacion na tur e delegacionnan si na final por yega na un peticion na Gobierno di Hulanda cu e prestamonan cu a duna y mester duna ainda pa un parti bira den forma di donacion.
Agenda informal
E tema central di IPKO ta e pandemia COVID-19 y e efecto di esaki riba e diferente paisnan di Reino. Prome den un reunion plenario publico a tuma luga un presentacion di e reciente desaroyonan pa cada pais. Den esaki pa Aruba a hiba palabra Rocco Tjon. Despues di e parti plenario, den gruponan cera a papia di e medidanan di cada pais, e miho practicanan, e colaboracion den Reino Hulandes te cu awo y riba e posibilidadnan pa mas colaboracion.
Den tres diferente discusionnan e enfoke lo ta riba e ultimo lunanan, e perspectiva a termino corto y e situacion a termino mediano / largo. Pa diahuebs na final di merdia (ora di Hulanda) lo tin e cierre di e sesion plenario publico.
