Desde awe mainta caba gobernacion riba nos pais ta secuestra, debi cu no por tuma decisionnan importante dor di un impasse den coalicion. De facto, no tin un problema entre MEP-POR y RED sino mas bien POR kier pa baha Marisol Lopez for di su funcion y ta boga pa haci esey urgente. Ta parce cu POR no kier pa Lopez keda den funcion ni un dia mas y a purba tur forma pa bah’e awe diabierna ainda. Tin motibonan urgente pa haci esey tambe, pasobra cada ora cu pasa, e cantidad di denuncianan penal na Landsrecherche pa corupcion y fraude den gobierno, bou maneho di ex Minister Otmar Oduber ta sigui aumenta.
For di seno di partido POR nos ta compronde cu Oduber, aunke el a bisa di lo a sali for di POR y for di politica, ta presionando e lider actual, mr. Andin Bikker, pa core cu e Minister urgente for di partido. Parce cu tin un sin fin di asuntonan cu no por mira luz di dia, manera ta un investigacion riguroso den DIP pa cu actonan fraudulento cu tereno, banda di contractnan lucrativo pa coordinadornan cu sea no ta traha mes of cu den un caso specifico, ni ta biba na Aruba! A bin descubri cu varios miembro di prensa ta “coordinador” tambe, dor di ta poni riba payroll pa haci propaganda pa e Minister y a cancela e “fiesta” aki y mesora rabiamento a start.
Tambe a laga para un contract grandi pa haci trabou di social media cu ex Minister Otmar Oduber a firma entrante dia 1 di october 2019 te cu 31 di december 2021, pues te despues di termino di gobernacion di MEP-POR-RED, cu de facto ta un asunto inusual. Ironico den esaki ta cu na september Otmar Oduber a anuncia cu e ta retira di politica y despues di e fecha ey a core firma un contract di PR pa e tempo cu e no ta na mando mas, marando man di Minister Marisol Lopez, pa den cierto forma, fors’e traha cu e hendenan di confiansa di Oduber ainda. Asina e ta mantene su poder y tin wowo y orea den e Ministerio cu el a bay laga. Asina mes e ta haciendo awo den e Ministerio di Husticia. Un acto peligroso pasobra e mesun Ministerio di Husticia bou unda Ministerio Publico ta resorta cu ta investigando e mesun ex-Minister como sospechoso di corupcion!
Awe Minister Andin Bikker a bin trabou cu un meta, pa baha Minister Marisol Lopez for di funcion. A pone presion riba MEP pa activa su Parlamentarionan y mesun cos a haci cu RED. A keda di yama un reunion publico awe ainda pa baha e Minister pero na final no a logra. A keda di hacie otro siman ainda, pasobra sea den MEP of den RED no por garantisa cu tin sosten completo. Tambe tin duda si Gobernador lo acepta e motibo cu ta duna pa baha un Minister, debi na presion comercial di e ex-Minister.
Tin indicacion cu e fin di siman aki lo tin hopi movecion andando, sin excluicu Hulanda lo por cay aden y forsa detencionnan pa evita cu ta destabilisa gobernacion di un pais, pa rasonnan comercial y coruptivo. Minister Marisol Lopez mester biaha diadomingo awo pa Hulanda pa hiba su yiu bay studia y kier haci esaki cu ne net na e momento aki pa pone bou presion. Hopi no ta compronde dicon Andin Bikker por a cambia asina hopi y laga su principionan na caya pa por sostene un sospechoso di husticia, lagando su amiga di hopi aña, Marisol Lopez, na caya. E fin di siman aki por spera desaroyonan nobo y interesante, bale la pena pa keda hopi pendiente!
