“Despues di e reunion publico den Parlamento riba e tema di scol SPO y Traimerdia, mi persona hunto cu coleganan Endy Croes y Hendrik Tevreden a haci bishita di trabao pa nos wak cu nos mesun wowonan con e situacion describi pa e trahadornan ta”, asina Edgard Vrolijk, miembro di Parlamento pa Fraccion di MEP a duna di conoce un rato pasa den un comunicado di prensa. E aclariacion a bin despues di bastante intercambio di palabra y publicacionnan riba Facebook entre Parlamentarionan di MEP y di RED riba e tema aki.
SPO Brazil
Durante di e bishita di trabao e Parlamentarionan di MEP a observa cu e edificio recien traha practicamente no ta cumpli pa ta un scol di ofishi manera debe ser. E lokaal destina como werkplaats ta demasiado chikito y no tin ventilacion, klasnan ta demasiado chikito unda cu entre 10 pa 12 alumno no por bay den cada klas y tambe e problema cu riolering. No tin un gymzaal y pa falta di klas mester comparti e localidad di housekeeping pa lokaal tambe pa duna les.
E scol a desaroya su mesun material pa por duna les unda cu e nivel ta cuadra hasta pa alumnonan di klas 1 por pasa pa EPB nivel 3 si nan puntuacion ta bon pero e material no ta aproba pa inspeccion di enseñansa. Despues di e bishita e Fraccion di MEP a traha un reportahe di tur cos cu a topa y a duna conseho na Promer Minister Evelyn Wever-Croes.
Traimerdia
Mesun dia a pasa mira con ta maneha un dia na Traimerdia. Den esaki tambe a constata cu tin un programa y a nota tambe e necesidad pa bin cu un sistema di registracion y falta pa traha riba e parti social na Traimerdia. Den esaki tambe a traha un reportahe na Promer Minister di kico a constata pero tambe consehonan con pa mehora esaki.
Decision di Ministerraad
Parlamento a haci tur locual por a haci como Parlamentario pa trece trankilildad pero tambe pa trata pa tur proceso di cambio cana na un manera structura pero tambe concreto. Tur decision cu no ta concreto ta crea desconfiansa y sigur resistencia. Y tur conseho cu nos manda, nan ta keda un conseho y e unico autoridad pa tuma decision ta Ministerraad cu ta consisti di 8 Minister y ta den e reunion aki unda cu decision a ser tuma pa laga SPO Santa Cruz y haci esaki tambe hunto cu SPO Brazil un scol cu un curiculo di 4 aña. Banda di esaki Ministerraad a tuma e decision di aloca Traimerdia bao di Minister di Asuntonan Social, Glenbert Croes, den bista cu lo percura pa traha riba e parti social y sigur tambe unda cu un proyecto cu antes nos tabata conoce manera FDEC por haya bida un biaha mas”, asina Parlamentario Edgard Vrolijk a enfatisa.
“Ami sigur ta contento cu e decisionnan tuma door di Ministerraad unda cu awor por traha na un manera mas concreto na un curiculo pa SPO Brazil y SPO Santa Cruz y alabes Traimerdia por mantene su formato y por sigui mehora esaki y percura pa e amplia den mas bario mirando su necesidad”, di acuerdo cu e miembro di Parlamento di e Fraccion coor geel den Parlamento.
