MEP bou presion di POR: Presupuesto 2020 ta secuestra

Pa simannan largo Gobierno a reuni internamente pa por a yega na un acuerdo cu CAft pa por presenta un presupuesto 2020 cu ta conta cu sosten local y di Hulanda. Awor cu Raad van Advies a manda su comentarionan y e ley a bay Parlamento pa tratamento, awor e Fraccion di POR kier haci cambionan drastico. Nan tin dos problema: Deviezen Provisie y e cambio den ley di ATA den cual Gobierno kier haya 35 miyon florin pa aña. Bisando esey, Gobierno lo keda cu un buraco grandi den presupuesto si elimina e dos entradanan aki.

E reto mas grandi ta pa Minister Presidente cu a haci un areglo caba cu Hulanda cu e presupuesto lo pasa sin problema e luna aki. Gobierno di Hulanda a contesta caba, cu si e presupuesto no ta aproba pa dia 1 di april 2020, cu nos lo ta den problema serio y un “aanwijzing” lo ta inevitabel. Partido MEP di nan banda ta purba di tur forma pa preveni esaki, pasobra politicamente e lo haci hopi dolor pa bay den historia cu a haya un KB den un periodo cu abo ta manehando. Aunke cu tanto AVP como MEP a yega di haya KB den pasado caba, ningun ta para wardando pa un otro.

E corant Solo di Pueblo awe a anuncia cu POR a manda un “Kaboom” pa tanto Minister Xiomara Maduro como tambe pa su consehero principal, ex Minister Nilo Swaen, cu lo ta esun tras di tur e pakete di medidanan cu Gobierno ta cla pa pasa pa pueblo. Den seno di MEP ta acusa Swaen di a bin cu BBO den pasado cu a causa cu MEP a perde eleccion y awor ta ripitiendo e mesun hazaña pa di dos biaha!

Fuentenan den Bestuurskantoor ta sigura cu tabatin “Coalitie beraad” caba riba e tema aki y e propio Otmar Oduber, cu a anuncia su retiro for di politica, mes ta sinta eyden representando su partido. Diripiente a nota un cambio den e tono di bos di ambos Parlamentario di POR den Parlamento. Ta mas cu cla cu nan ta vociferando e opinion di nan lider, cu no lo sostene e presupuesto manera cu e ta awor aki. Si e presupuesto no pasa, lo tin problema.

Minister mr. Xiomara Maduro ta purbando di tur forma pa convence comunidad, gremionan y sindicatonan cu e medidanan aki ta necesario pa por drecha finansa publico di nos pais. Pero ta parce cu den e proceso el a lubida di convence su partnernan den coalicion, cu awor a mand’e un mensahe cla cu nan lo NO sostene e medidanan aki, por lo menos dos di nan sigur cu no!

Pero esey no ta tur, pasobra e fraccion di RED tambe ta ausente. Parce cu Ricardo Croes ta na Hulanda cu su señora pa motibo di salud y cu no tin un fecha pa regresa. Teniendo cuenta cu coalicion a baha di 12 pa 11 asiento despues di salida di Daphne Lejuez, cu ta escencial pa TUR Parlamentario cu ta sostene coalicion ta presente pa cualkier ley por pasa. Ausencia di RED y pio ainda, protesta di POR lo por tranca henter e proceso di aprobacion di presupuesto.

Parlamentario Alan Howell ta Vice Presidente di Parlamento y tin un voto pa Fraccion di POR durante e reunion pa pasa Presupuesto 2020. Sin su voto, ta imposibel pa e presupuesto por mira luz di dia.

Awor ta sinti cu MEP a pusha e pakete di medida aki sin busca sosten di coalicion. Ta pensa cu RED lo ta OK pasobra e ley di legalisacion di plantamento di marihuana ta cla pa drenta Parlamento, pero no a conta cu e punto di bista di POR den esaki. E realidad politico ta cu 11 asiento kita 2 ta 0. Si no bin cambio den postura di POR, anto e reunion lo no por continua, cu tur consecuencia cu esaki por trece cune. De facto, por bisa e ora ey cu nos presupuesto ta “secuestra” pa falta di sosten politico den e coalicion MEP-POR-RED.

Parlamentario Dellanire Maduro tin apenas algun siman den Parlamento y ya ta hay’e confronta cu un decision masha importante pa nos pais. Su voto lo por causa hasta caida di Gobierno y lo bay den historia cu a basha un Gobierno abou, cu den pasado a ocasiona cu e pueblo votado ta castiga esun cu benta un Gobierno legitimo abou.

Un cos ta sigur, comunidad no ta contento cu e pakete di medida aki y partidonan politico ta consciente cu un hende lo mester paga e prijs politico pa e decisionnan aki, aunke kisas nan por ta bon finansa publico. Ta sinti awor cu POR, teniendo cuenta cu nan retonan interno cu salida di nan lider, no ta dispuesto pa bay eleccion cu e realidad aki tambe riba nan cuenta y ta mustrando di kier distancia nan mes di e decision. E “timing” ta mustra casi perfecto, e lider ta baha prome y despues coalicion ta cay den otro y ta yama eleccion pa asina mira ken lo culpa e otro di decisionnan tuma den gobernacion.

Noticia relacionaMas for di e autor