MEP a recorda Betico cu tur honor

376

Prome minister y lider di MEP Evelyn Wever Croes para na graf di Betico Croes a honra e persona cu a hiba un lucha grandi pa Aruba su derecho di autodeterminacion.

Awe “nos a bini hunto aki pa conmemora e 34 aña  cu nos Libertador y gran Estadista Betico Croes a bay laga nos,” Wever Croes a bisa para dilanti graf di Croes y rondona pa familiar y miembronan di e partido.

E mandatario a recorda con e y famia a ricibi e noticia di fayecimento di Betico na Hulanda. A conta un poco di e situacion desde cu el a sufri e accidente dia 31 di december. Con nan a sinti cu e tabata lucha pa su salud, tabata trata di comunica pero su estado di coma no tabata permiti esaki. “Ta parce cu e tabata lucha pa sali di su estado y cu e lo vence. Nos a carga e speransa ey tur e 11 lunanan largo cu e tabata interna. Sinembargo Papa Dios tabatin otro plan y nos mester conforma.”

MEP a recorda Betico cu tur honor

MEP a recorda Betico cu tur honor. Click e link pa mas https://24ora.news/2JcNrSw

Posted by 24ora on Friday, November 27, 2020

Wever Croes a conta un tiki di su cantidad grandi di logronan. “El a logra hopi mas cu nos awendia. Esey ta loke awe nos ta conmemora. Nos ta agradecido pa tur loke el a nifica pa nos. Nos kier gradici su famia pa e sacrificio cu nan a haci pa Aruba por tabatin un lider pa atende cu tur e retonan cu e pais tabata pasa aden. Boso tabata hopi hoben ora cu boso tata a bay for di e mundo aki y a keda solamente cu recuerdonan. Ohala cu e aprecio cu henter pueblo a demostra for di e tempo ey, lo por yena maske ta un tiki e bashi cu boso tin den boso curason.”

El a expresa gradicimento pa e lucha hiba y a pidi pa un biaha mas uni y hiba e pais dilanti.