Dialuna e Secretario di Estado di e Politica Publico Anticorupcion di Ecuador, Luis Verdesoto, a renuncia na su cargo den Gobierno di Ecuador, na momento den cual Ministerio Publico ta investigando un supuesto red di corupcion den e empresanan publico di e sector electrico.
Den un comunicado, Ministerio General di Comunicacion di Presidencia a recorda cu a crea e Ministerio Anticorupcion di Ecuador cu e meta di diseña y implementa e politica publico den materia di lucha contra corupcion cu tin resultado palpabel.
“E ta un trabou cu mester reforsa mas cu nunca y cu mayor profundidad, apoyo y agilidad tanto den e diagnosticonan como den e solucionnan sugeri,” el a indica den un comunicado.
El a agrega sin duna mas detaye: “Nos a dicidi na acepta e renuncia na su cargo presenta pa Luis Verdesoto.”
Den un prome informe prepara pa e Ministerio cu Verdesoto tabata lidera tocante supuesto actonan di corupcion cometi den e empresanan estatal, a detaya e hipotesis di e existencia di e supuesto iregularidadnan y ilegalidad den e companianan manera Flota Petrolera Ecuatoriana (Flopec) y e Corporacion Nacional de Electricidad (Cnel), entre otro.
“Aunke den ful e informe, den varios parti ta enfatisa cu e informacion duna no ta necesariamente un prueba, sino mas bien ta presenta un supuesto ‘modus operandi’ uza particularmente na Cnel y Flopec”, e canal di television Teleamazonas a informa.
El a splica tocante Cnel, e documento ta indica cu na momento di opera un monopolio, a habri e posibilidad na e gruponan corupto pa tin acceso na uzo di informacion privilegia pa nan propio beneficio.
Mas aleu, e ta agrega cu e supuesto grupo corupto ta consisti di e ekipo di areanan tecnico y e apoyo, e ehecutivonan di e area y e gerente general. E ta indica tambe cu supuestamente e beneficionan corupto, aparentemente tabata recolecta y tabata entrega den pago mensual ordena, hipoteticamente pa e maximo autoridad of e operadornan di confiansa.
Tocante Flopec, den e informe ta destaca e existencia di posibel patronchi di corupcion cu lo ta forma basa riba e existencia di monopolio den transporte. Ta bin acerca e supuesto discrecion den e directiva y e operacion di e empresa como tambe e aparente falta di un control efectivo riba su maneho y su finansas.
El a indica cu Flopec ta opera cu diesdos barco di carga: dos ta di propiedad di e compania, cuater ta gehuur y e seisnan cu a resta ta un contribucion di un partner den e compania.
Den e informe ta resalta cu e gastonan di huur di e barconan ta demasiado halto: 30 mil dollar pa dia, compara cu e ofertanan cu no ta supera e dos tercera parti di e balor, segun e canal di television a informa.
Despues di e denuncia di e medio digital La Posta di un supuesto plan di corupcion di e companianan publico den cual supuestamente tambe lo ta involucra e swa di e mandatario, Danilo Carrera, e hefe di estado a nenga cu e corupcion a filtra den su gobierno.
Den un entrevista emiti como cadena nacional, Lasso a indica cu no por generalisa e echo di c’un ex-funcionario a cay “den tentacion di gana placa di mal manera”.
“Loke cu tin actualemnte ta un supuesto acto di corupcion di un ex-funcionario di Gobierno,” el a bisa den referncia n’e ex-presidente di Empresa Coordinador di e Companian Publico (EMCO), Hernan Luque, di cual a filtra audio di supuesto combersacion cu Ruben Cherres, otro supuesto complice den e trama.
Siman pasa diabierna, Ministerio Publico un biaha mas a tene nuebe entrada hudicial den e caso denomina “Encuentro”, despues di e filtracion di e audionan di La Posta, den cual e supuesto integrantenan di e aparente trama aki a señala Carrera como un supuesto “padrino.”
Den e documentonan aki ta aparece combersacionnan atribui na Luque y di Leonardo Cortázar y Cherres. E ultimo aki ta menciona un supuesto pago di 30 mil dollar mensual na “Danilo”, segun e audio.
Lasso a bisa cu el a pidi retiro di Luque for di Gobierno na final di aña pasa, “pa falta di confiansa” y awo e ta spera cu por localis’e pa asina e presenta dilanti di husticia.
Carrera a rechasa e denuncianan di La Posta y entrega un demanda hudicial pa pago di daño y perhuicio 500 mil dollar contra e periodista periodista Andersson Boscán.
