Melvin Tromp: Mi ta desea Minister Otmar Oduber pronto recuperacion

Ta na su luga pa desea Minister Otmar Oduber un pronto recuperacion, sigur despues di a sigui su discurso durante di reunion di Parlamento diaranson atardi  segun Melvin Tromp di partido AVP ta mustra den su comunicado.

“Sin duda ta na su luga pa mi desea Minister Oduber un pronto recuperacion ya cu realmente ta bisto cu e minister di gabinete Wever Croes, ta sufri seriamente di un amnesia politico hopi serio y hopi pisa.

Scuchando su intervencion durante di e reunion hopi hende a keda babuca e falta di consenshi, e falta di curashi y e falta di seriedad di e mandatario aki, kende den un forma hopi determina, kier pa pueblo lubida cu e tabata miembro di partido AVP pa mas cu 20 aña y  cu el a forma parti practicamente por completo di gabinete Mike Eman I y II.

Ta algo serio pa scucha un politico cu su experiencia cuestiona presupuesto di pais Aruba pa 2017 mientras cu su persona a aproba, sostene y firma e presupuesto aki y awor ta pretende cu e no tin arte ni parti den esaki.

Ta tristo pero na mes momento hopi comico, tuma nota con Minister Presidente Evelyne Weer Croes, ta sinta tras di minister Otmar Oduber ora cu e tabata dirigi su mes den Parlamento, aplaudiendo y c’un sonrisa grandi riba su cara y esaki ta un aspecto cu a laga hopi hende sorprendi y babuca.

Aki e amnesia politico di minister Oduber a resalta mas cu tur otro momento, ya cu pueblo por corda bon cla con net e tata di e actual Prome Minister, ta esun cu a lanta un caso contra di minister Oduber den pasado den e caso di FDA y cu hasta a conduci na detencion di minister Oduber, kende yorando dilanti camaranan di television y di medionan di comunicacion, a yora pa husticia, sclamando su alegria cu partido AVP a logra di gana e caso aki caminda e por a Sali liber di tur acusacion cu tata di su prome minister a cuminsa contra dje pa ladron.

Ta mesun minister Oduber aki tambe den pasado, a  bira famoso cu oposicion pa loke a wordo yama e “ATA Bank’ caminda su persona a trata di manipula den tur forma pa trata di haya mas fondo na su disposicion como minister di turismo e tempo ey.

Scucha minister Oduber papia den parlamento di supuesto maniobranan cu fondonan cu a bay pa clubnan di bala, pa fundacionnan ta simplemente cos di hari ya cu ta conoci publicamente cu minister Oduber a wordo cuestiona pa hopi cos cu el a haci den pasado pa e propio integrantenan cu awe ta su colega minister,  caminda hasta a duna su persona e bijnaam di ‘strawberry gate.’

Realmente minister Oduber mester a sufri un sla duro na su cabes, un sla politico asina fuerte cu el a perde parti di su memoria politico, sigur ora cu e bisa cu cara di palo, cu pueblo a rechasa partido AVP  y a sostene su persona pa e bin bek como minister.

Haciendo e observacion aki nos solamente minister Oduber a mustra cu e ta sufri di un amnesia politico serio, na mes momento el a mustra cu e tin problema serio pa conta cifra, mirando cu el a bira e lider politico cu mas a bay atras den voto personal, cayendo cu casi 3 mil voto y pa awe e bin pretende cu el a haya sosten di pueblo.

Minister Oduber claramente ta mustra cu e tin problema pa reconoce e diferencia entre 9  asiento y 2 asiento, y su amnesia politico ta pone pensa cu esaki ta haci’e escogencia di pueblo mientras cu simplemente henter su plan politico a bira algo cu e mes no a spera.

Na mes momento cu minister Oduber tabata purba di convence su mes cu e ta minister integro, cu e ta un minister popular den e gobierno di MEP y cu 7 aña como Minister di gabinete Mike Eman ya no ta conta y solamente un aña cu el a bay campaña paga cu placa di pueblo, ta muestra cu minister Oduber tin mester di ayudo lihe pa recupera su memoria politico, sigur e tempo cu el a cuestiona tambe e famoso caso di su prome minister, esta Irus Crius.

Na minister Oduber, un pronto recuperacion di su memoria, pa e por corda tur loke el a haci y keda sin haci, pa e carga su responsabilidad di 7 aña como minister manera un minister integro tin cu haci,” Melvin Tromp di AVP a declara.