Pa añanan largo, e lider di MEP, Evelyne Wever Croes, a bin ta tratando di atacha credibilidad di rivalnan politico, principalmente esunnan di partido AVP den gobierno, cu cantidad di storianan sin base.
Parlamentario Melvin Tromp ta mustra cu ta algo di condena y rechasa totalmente ya cu principalmente un lider politico, mester duna e miho ehempel posibel y no fabrica storianan sin sentido tratando di destrui opinion publico di rivalnan politico, cu insinuacionnan sin base.
“No ta un of dos bes esaki a tuma luga, esta cu tanto e lider di MEP, Evelyne Wever Croes como miembronan di su partido y campañadonan di MEP, a lansa cantidad di mentira contra di politiconan di AVP, sin cu nunca nan a presenta prueba concreto di tur loke nan ta bisa.
Mi persona entre otro na varios ocasion a scucha insinuacionnan sin sentido durante di cantidad di reunion publico den Parlamento, caminda Evelyne y otronan ta sconde tras di inmunidad Parlamentario, sin cu nunca nan a bin pafo di Parlamento y bisa mesun cosnan aki of entrega keho contra di loke nan ta papia.
E lider di MEP a yega di cuestiona na varios ocasion integridad di cantidad di rivalnan politico, principalmente nos lider y Prome Minister Mike Eman pero nunca a cana e caminda corecto y legal pa actua contra di su ponencianan.
Sinembargo na momento cu den prensa local a Sali publica di transaccionnan financiero di miles di florin pa un cuenta di banco Irus Crius caminda nomber di Evelyne Wever Croes a keda publica, tampoco el a actua y nunca a tuma e pasonan necesario pa aclaria of limpia su nomber di e caso aki te dia di awe.
E fin di siman aki otro noticia serio a drenta procedente for di Merca, caminda hendenan yega na e lider di MEP, hendenan cu ta activista grandi di su persona y di su partido geel a keda deteni pa traficacion di droga y e prome reaccion di Evelyne ta manera tur hende a spera di dje.
Hisa benta su propio hendenan afo, dor di laga nan colga pa nan cuenta y tratando di duna e impresion cu nan no tin vinculo algun cu su persona of su partido politico.
Ta su hendenan y aki mi tin cu refresca memoria di Evelyne, kende durante di un reunion hunto cu otro coleganan di su fraccion, a yega di bisa cu mi nanishi ta blanco di puiro blanco, y awe loke nos ta mira cu e puiro aki ta na gran cantidad den su propio circulo familiar, circulo di amistad y circulo politico.
Esey ta e berdad, esey ta loke ta pasando y ta momento pa e duna contenido na su supuesto lucha pa integridad den politica di nos pais, y asumi su responsabilidad den esaki tambe y no bay sconde tras di declaracionnan cu henter Aruba sa cu no ta cuadra cu e berdad.
E tipo di desaroyonan aki na Merca ta bolbe lanta e duda ta for di unda partido MEP a saca fondo pa e campaña miyonario cu e partido a bin ta hibando den e campaña electoral aki y con y kende lo a financia esaki.
Ta algo cu lider di e partido mester aclaria tambe mirando e forma con MEP ta hibando su campaña electoral cu cantidad di pancarta grandi, cu borchinan di propaganda cu sin duda a rekeri un inversion miyonario.
Awe nos por bisa cu integridad ta batiendo cu man pisa riba porta di Evelyne Wever Croes pa e splica cosnan cu ya e no por sconde mas,” Parlamentario Melvin Tromp di fraccion di AVP ta splica.
