Un politico miembro di partido AVP, un hende ta wordo forma y prepara pa sirbi pueblo na tur momento, pa traha na bienestar general di e pais pero mas cu tur cos, pa percura pa esunnan mas vulnerabel, ta ricibi e atencion cu nan merece y tin derecho ariba.
Melvin Tromp vocero di partido AVP ta mustra cu ora cu sigui historia di partido AVP, semper esaki ta wordo transmiti den un vision dirigi pa percura pa un miho bida pa tur ciudadano di e pais aki.
“Si nos tuma e era nobo despues di e Status Aparte, partido AVP semper na momento di carga responsabilidad gubernamental, a ehecuta un vision dirigi na progreso y felicidad di tur hende, mas ainda esunnan di menos recurso.
Como miembro di partido AVP bo ta forma parti di un vision cu mester percura pa un miho bida tur hende, na progreso di e pais a base di plannan concreto y realisabel.
Na mes momento como miembro di AVP nunca lo bo wordo prepara of dirigi pa tuma medidanan contra pueblo, di trapa drecho di nos ciudadanonan, di persigui ningun hende politicamente, semper percurando pa sirbi interes di tur hende y no di bo mes of di bo amigo y famianan.
Den ultimo dianan cu nos ta mirando asina hopi persecucion politico tumando luga, ciudadanonan cu ta wordo manda cas, tata y mama di famia lagando nan c’un situacion sumamente delicado pa loke ta nan bienestar financiero y social, e ta pone nos para keto un rato y refleha seriamente kico ta pasando.
Ta di lamenta cu pueblo tin cu tuma nota c’un persona cu a wordo educa y forma den e famia bercde di AVP, cu a wordo expone na un vision di semper para pa interes di pueblo, awor a converti su mes den un di e pio enemigonan di pueblo.
Como politico di AVP nunca lo crusa bo mente di impone medida inhusto contra pueblo, di manipula cu placa di pueblo pa sirbi interes di sponsornan di campaña su cu a duna atencion na esunnan mas vulnerabel financieramente den nos comunidad.
Ta impresionante pero na mes momento sumamente tristo realisa c’un persona forma pa e vision social di AVP, a forma parti di e decision di un gobierno cu ta rancando 160 miyon for di cartera di pueblo, sin cu pueblo mes ta ricibi un solo cen di e placa aki.
Sinembargo e tipo di politiconan aki tambe ta parti di bida, ora cu manipula c’un poder minimo cu bo a haya den eleccion, pa percura pa bo por haci loke cu bo kier, abusando di e poder brinda na bo como partner di gobierno, pa beneficia bo hendenan, bo amigonan y bo sponsornan.
Pa pueblo no tin absolutamente nada, no tin reduccion di prijs di awa y coriente manera priminti, no tin reduccion di prijs di gasolin, no tin reduccion di edad di pensioen manera priminti, no tin aumento di onderstand manera priminti, no tin aumento di minimumloon manda priminti.
Loke a bin ta tumando luga ultimo aña aki, ta di un politico cu a perde den su ansha pa ta lider politico, cu a pone interes di pueblo un banda pa sirbi su propio interes politico y financiero, lagando pueblo na merced di un partido MEP, cu ta sigui kere den su vision geel di ranca placa mas tanto cu por for di cartera di pueblo.
Persecucion politico cu ta tumando luga ultimo lunanan, ta resultado di un vision y mentalidad negativo, di politiconan cu nunca lo sirbi e interes general di nos pueblo pero mas tanto lo sirbi interes propio, interes di amigo y famianan,” sr Melvin Tromp a declara.
