Despues cu miembronan di e fraccion di AVP a tene un conferencia di prensa siman pasa dilanti Sint Aloysius School, ubica temporalmente na ex edificio di VAD riba L.G. smith Blvd., esaki a trece un reaccion hopi pisa di Vladimir de Cuba, director. Pero AVP no ta compronde ya cu niun momento nan a subi tereno di e scol, y a keda riba e parti publico. A papia na e ocasion ey di e maneho desastroso di Gobierno.
Melvin Tromp, vocero di Fraccion di AVP, no ta compronde e ex candidato di MEP aki. A papia di “e intencionnan maligno di Minister di Enseñansa cu a tuma e decision pa cobra e stichting 8.5 miyon florin”. E intencion aki ta haci dificil pa e stichting mantene e diferente werksternan na e scolnan catolico. El a tuma nota di e forma chistoso y sarcastico cu De Cuba a reacciona dunando poco seriedad na e tema di preocupacion.
Normal ta, segun Tromp, cu si a papia malo di un scol ta e directora di e Stichting ta reacciona. Pero e biaha aki ta De Cuba a reacciona, segun nan a tuma nota di e conferencia prensa cu el a yama. Esaki a causa cu tanto su persona como Parlamentario Sneek a haya yamada di diferente mayor expresando nan mal contento pa e situacion. Y nan a kere cu sigur de Cuba lo a bay splica nan unda e placa di airco di e studiantenan a keda. Pero nada di esey y e mayornan ta pidi pa un contesta. Tin incertidumbre di kico a pasa cu e placa aki. “Esey e mayornan kier haya un contesta riba dje.”
