Ki ora ta basta? Ki ora un persona por samia su consenshi y dicidi cu e no por sigui haci loke el a bin ta haciendo pa dos aña caba, esta di sigui gaña henter un pueblo di forma con Prome Minister Evelyn Wever a bin ta haciendo esaki.
Melvin Tromp di partido AVP ta mustra cu e lider di MEP a perde tur gevoel pa loke ta papia berdad, ta sigui insisti pa purba manipula sinceridad di pueblo di Aruba, cu storianan increibel cu e mes lo no ta kere aden. “Ta increibel pa mira y lesa tur locura cu Evelyn Wever Croes ta capas di papia y pone riba papel, pa trata di pinta bon, un cos cu su gobierno a haci malo y cu su persona ta sigui insisti pa haci.
Oranan despues cu noticia a yega for di Hulanda cu Conseho di Ministernan di Reino diabierna venidero lo trata e concepto di un ‘aanwijzing” pa Gabinete Wever Croes, e Prome Minister aki ta declara y manda riba medionan social, cu ta Hulanda ta poniendo presion riba su gobierno. Evelyn ta bisa cu su gobierno ta trahando duro pa evita e aanwijzing aki, cual decision lo bay haci cosnan sumamente mas dificil pa pueblo di Aruba, pero ta un aña pasa cu el a firmo un protocol cu Hulanda cu cual e no por cumpli cune.
Dos siman pasa el a wordo ordena for di Den Haag pa e destrui e ley di LAFT aproba pa e tres fraccionnan den parlamento cu ta sostene su gobierno pero ainda no a haci esaki y tur cos ta mustra cu e no tin intencion di bin Parlamento pa haci esaki tampoco.
Na luga di tuma e desaroyonan aki na serio y cuminsa cumpli cu loke e mes a priminti Hulanda cu e lo haci, ainda Evelyn y su gobierno no a cuminsa reduci gastonan di e aparato di gobierno, no a manda e centenares di hende cas cu el a tuma desde cu su gabinete a tuma mando.
E no a logra pasa e ley pa legalisa presencia di CFT aki na Aruba y e tres fraccionnan den Parlamento a dicidi di cambia e ley aki caminda e rol di CFT no ta nifica mucho cos aki na Aruba pero nan tin cu duna cuenta na Parlamento y no na Conseho di Ministernan di Reino.
E falta di seriedad y falta di respet di Prome Minister di Aruba pa cu gobierno Hulandes ta bolbe keda demostra den e prome reaccion di Evelyn riba social media oranan despues cu a bira conoci cu e concepto di e aanwijzing ta cla pa wordo trata diabierna venidero.
Segun Evelyn den un mensahe riba social media ta papia di presion di Hulanda y cu cara di palo di un gañado, ta trata di convence pueblo atrobe cu otro di su mentiranan, papiando di desaster cu gobierno di AVP a laga atras. Cu hopi curashi e ta bolbe papia di debe cu lo a wordo crea pa e gobierno anterior lubidando por completo cu e problema di mas grandi cu Aruba tin na e momentonan aki, ta cu tanto CFT como Secretario di Estado Knops, ta mustra cu gabinete Wever Croes no ta cumpliendo cu palabracionnan haci.
CFT a di dos aña sigui ta mustra cu Prome Minister y Minister di Finansa no ta cumpliendo cu normanan cu nan a bay di acuerdo cune cu gobierno di Hulanda, esta di baha gasto di personal y al contrario, e gastonan aki a sigui subi den forma hopi serio.
No tin reduccion di personal manera a priminti Hulanda cu lo haci, no a reduci gastonan adicional di maneho di gabinete Wever Croes manera a priminti Hulanda di lo haci.
Aki ta bon pa pueblo compronde cu no e asuntonan aki no tin nada di habe cu maneho di gobierno di AVP pero claramente tur hende por compronde for di declaracionnan di mandatarionan Hulandes, cu e problema mas serio di Aruba na e momentonana aki, ta gañamento yfalta di seriedad di gabinete Wever Croes. Informacion cu a bin for di Hulanda a papia algun dia atras riba e maneho di gabinete Wever Croes cu ta dirigi solamente riba ‘fiends and family’ mientras cu no ta drechando e situacion di pueblo.
Otro problema grandi ta e miyones cu gabinete Waever Croes a dicidi di pone un banda pa su plan social cu despues di casi dos aña ningun hende conoce y ningun hende por mira of sinti. Prome Ministe4r Eevelyn ever Croes tin cu bira serio cu su mes prome pa e ora e por bisa serio cu pueblo y duna pueblo e respet cu pueblo merece,” Melvin Tromp di partido AVP ta declara.
