Vocero di Partido AVP, Melvin Tromp, den un declaracion despues di tuma nota di e sentencia di Corte di Apelacion na Corsou, den e caso di Gobierno contra Fundacion Lotto pa Deporte, a bisa di ta contento cu tres Hues a confirma cu mester tene politica leu di e fundacion y pa wanta Lotto pa Deporte “Endy Croes Proof”. E ex Parlamentario ta considera cu Croes y MEP tin hopi curashi di papia mes di Lotto, despues cu el a bay cera y condena pa malversacion, mal maneho y di a enrikese su mes, su mama y rumannan cu placa di Lotto. Un hende asina hamas por asumi un funcion politico den su bida, pero esaki no solamente a logra haya MEP para bandi dje den su fechorianan, pero ta purba keto bay pa haya acceso na e saco di placa di Lotto.
“Mi ta haya e tendencia aki hopi positivo pa comunidad y politica. E pret ta cu actual Minister Dangui Oduber sa masha bon cu ex Minister Alex Schwengle a cambia e reglanan den Lotto, precisamente pa evita cu famia Croes ta bolbe hinca man eyden. Awor e ta keda keto y laga Endy Croes su so bringa siendo cu a perde tur nan casonan te cu awor contra e fundacion. E unico ganado ainda ta abogado Ruiz, cu si cliente gana of perde mes, e si ta cobra”, asina Melvin Tromp a sigura. E ta corda MEP cu asina nan a haci den FCCA tambe ora nan a baha di Gobierno na aña 2009. Partido AVP a laga e fundacion 8 aña largo sin mete cu nan y sin hiba nan Corte pa purba drenta eyden. Mester respeta cu e miembronan di Hunta di Supervision ta drenta cu un periodo di bay cas cu no necesariamente ta hunto cu asignatura di e Gobierno na mando. “Awor MEP ta tumando un dosis di nan mesun remedi cu nan a kere di a haci cu AVP”, segun Melvin Tromp.
E ex Parlamentario ta corda cu ta den hopi dolor di cabes Gabinete Mike Eman 1 y 2 a pasa aden pa via di Lotto y pa via cu famia Croes a casi manda e loteria bancarota. Si no tabata pa Canadian Bank Note cu a bin inverti miyones den e fundacion, cu awe Aruba lo no tin Loto mas. No ta normal con a beneficia rumannan, companianan di mama di Endy Croes y asina por sigui menciona. A lanta varios compania e tempo ey y tur tabatin relacion cu e loteria, hasta e pizzeria! Pues, cu rason e Parlamento di e tempo ey, cu Dangui Oduber y Evelyn Wever sinta eyden a bay di acuerdo y tabata consciente cu lo haci Lotto “Endy Croes proof”!
“Pero e no a cambia, pasobra ainda e ta meti den baina. Ta den su sanger e ta core, esta pa semper ta busca un forma pa saca beneficio of corumpi nos sistema”, segun Melvin Tromp. E ta referi na e investigacion cu Hulanda a cuminsa cu Visa Hulandes na Republica Dominicano pa motibo cu Endy Croes tabata trece hende pa softball y laga nan keda traha atras sin permiso. El a burla di e sistema di Hulanda y di DIMAS di Aruba pa añanan largo, te ora cu a gar’e. Pero no ta basta, pasobra te awe ainda e ta den Asosacion di Softball y cu placa di Stichting Subsidie Commissie ta biaha rond mundo, hayando “daggeldvergoeding” di e fundacion, maneha pa Gobierno mes! Ta cuestiona si hayamento di placa asina pa biaha pa Softball no ta bay contra e reglanan di “versobering” di salario di Parlamentarionan, pues cu ta deber di Endy Croes pa raporta cu e tin mas entrada pa nan por kit’e for di su salario di Parlamentario. Asina dr. Kelly a haci tempo e tabata Parlamentario di MEP, pero ta dificil pa compara otro Parlamentarionan di MEP cu Endy Croes ora ta referi na integridad y uzo di fondonan publico.
“Endy Croes a laga un les grandi pa politica di Aruba y awe e ta cuestionando e mesun reglanan cu partidonan politico, incluyendo MEP, mester a adapta pa evita cu e y su famia ta sigui enrikese nan mes cu placa cu Lotto. Cu e sentencia di Corte di Apelacion awe, no un ni dos, sino tres Hues hunto a garantisa cu e mannan di Endy Croes ta keda leu di Fundacion Lotto pa Deporte pa semper!”, asina Melvin Tromp a termina bisando.
