Tres aña di castigo dor di cantidad di medida. Tres aña sin mira un solo proyecto cu ta sirbi interes general di pueblo. Tres aña di un gobernacion sin pia ni cabes, sin vision y sin plan, a pone e pais den e situacion cu e ta awe.
Melvin Tromp di partido AVP ta mustra cu ta simplemente bergonsoso pa mira tur loke a bin ta pasando, caminda un gobierno cu a falta respet pa pueblo, dor di impone medida despues di a sigura cu lo no tin medida, awor ta faltando respet pa nan mes.
“Nunca antes pueblo a conoce un gobierno cu tin como meta tur dia, di trata di gaña mas tanto hende cu por, trata di impone medidanan cu ta sirbi interes di un solo grupo di amigo y famianan.
Loke ta pasando ultimo dianan, ta simplemente consecuencia di un set di politiconan cu nunca tabatin interes di pueblo na pecho, caminda den nan propio seno, nan a cuminsa come otro bibo awo.
E coup cu nan a purba contra Minister Marisol Lopez Tromp diahuebs ultimo, tabata ehempel bon cla cu gabinete Wever Croes, no a importa en absoluto kico pueblo ta pensa y kico pueblo ta desea.
Den bista di henter un pueblo, den e forma mas bergonso cu por ta existi, a dicidi di sacrifica Minister Marisol Loez Tromp, kite for di caminda ya cu e tabatin e curashi di denuncia cosnan incorecto y kisas hasta coruptivo cu a bin ta tumando luga.
Aki mi kier a mustra pueblo cu Prome Minister Evelyn Wever Croes na luna di juli a manda suspende un reunion publico di Parlamento, caminda en realidad e no tin e autoridad pa haci esaki, sinembargo ora cu e tin un set di marioneta sinta den parlamento, esaki por ta posibel tur dia.
Evelyn a intermedia, a yega na un tipo di consensus cu Minister Marisol, pa despues contra di tur regla di seriedad, lanta bela bay pasa vacacion na Miami, mientras cu practicamente tur anochi como Prome Minister, e tabata pidi y hasta exigi cu su toque de queda, pa pueblo keda cas.
Un biahe cu a lanta hopi critica y hopi rabia den pueblo, ya cu Prome Minister no por ta sincero dor di exigi di tur hende pa keda paden pa no plama e virus, anto e mes ta biaha bay Miami practicamente den e centro di e pandemia.
Awor algun dia despues cu Evelyn Wever Croes a bin bek for di su vacacion, ta surgi un tipo di atraco den un reunion di Parlamento riba asunto di spearfishing, caminda diahuebs ultimo den forma di sorpresa, e marioneta di mas grandi cu ta lider di fraccion di MEP, Rocco Tjong, ta presenta un mocion di desconfiansa contra Minister Marisol Lopez Tromp.
E biaha aki Evelyn no a interveni, e no a manda para e reunion pa bay dialoga cu Minister Marisol, ya cu e biaha aki tur cos ta mustra cu ta for di su oficina, for di Conseho di Minister mes e ordo aki a bin.
Ayuda pa un set di parlamentarionan di MEP y di POR kendenan facilmente ta permiti gobierno usa nan ki ora cu ta, a trata di retira Minister Marisol cu solamente 10 voto contra, permiti pa Presidente di Parlamento Ady Thijssen.
Un gobierno cu ta papia di integridad, ta bira ehecuta un atraco asina, keriendo cu nan a haci algo grandi pero caminda den bista di pueblo na e momentonan aki, nan kier a stop Marisol di divulga actonan contra regla y ley cu a bin ta tumando luga.
Berguensa tanto fraccion di MEP y POR mester tin, mas berguensa ainda conseho di minister mester tin, caminda dos di nan, sinta den sala di parlamento, a haci como sifuera nan no sa di nada, cu henter e cos aki a sosode sin nan conocemento.
Pero e ey ya caba parlamentario Howell a basha abou caba bisando cu tin problema pabou, cu den conseho di Ministerraad cosnan no ta cana bon.
Si gabinete Wever Croes tin respet pa pueblo, respet pa su mes, respet pa constitucion, si nan tin dignidad cu tanto nan ta papia di dje, si nan tin honestida of sikiera di ta honesto cu nan mes, bay gobernado dialuna mainta y alivia e presion cu nan a pone riba pueblo y caba cu e forma con lider di un partido di un solo asiento, ta haci y bisa loke cu e kier contra di un gobierno di cual e mes ta forma parti,” Melvin Tromp di partido AVP a declara.
