Tanto Paul Croes como su casa Melony Croes-Paesch den Corte durante ultimo palabra no por a wanta nan emocionnan y a pidi Hues disculpa pa t’asina emocional. “Libera nos di e pesadiya aki; nos tin dos aña ta wordo castiga caba,” tabata palabranan di tanto Paul como Melony.
Na final di tratamento di e caso IBIS, e acusadonan Paul Croes y Melony Paesch a haya chens di ultimo palabra y specialmente den e parti di Melony el a saca tur su emocionnan wanta y scondi durante e ultimo dos añanan pa e forma cu nan a wordo trata. E no por deduci otro cu OM su meta tabata pa colga Paul, con por ta otro si e acusacion ta papia di e periodo di prome di januari, 2014 bay ariba, ora cu Paul tabatin apenas un luna como Minister.
Melony a cuestiona con e invalnan a tuma luga cu a pone nan sinti cu ta terorista nan ta, pero cu no a wordo deteni. “Kico e hendenan a bin haci papi,” e yiu homber a puntra Paul. E mentira piadoso usa tabata “nan a bin instala alarma”, mientras cu su yiu cu un mirada incredulo a contest’e “pero cu un “gun”?” mustrando riba e armanan di e Polisnan.
Ambos ta di acuerdo cu investigacion por wordo haci pero ta e forma con OM a atende cu e caso aki, unda principio di igualdad tampoco a wordo manteni, unda cu nan a sinti nan mes manera terorista; yiunan a keda traumatisa te dia di awe; Melony, kende tur anochi, durante cu su casa tabata deteni, pa miedo cu su yiunan presencia otro “inval” den oranan di madruga, tur atardi ta pak un tas di paña, subi auto cu su yiunan core rond, of pasa y keda na cas di diferente persona. E rutina aki el a sigui pa un periodo largo te ora cu Paul Croes a sali liber; el a conta con e yiunan scondi ta bay puntra hendenan cu nan topa si nan a mira nan tata pasobra nan no sa di dje. Tur esaki ora cu Paul Croes a pasa 86 dia cera den isolacion y no mag di tabatin contacto ni cu e dos muchanan. “E derecho di mi yiunan a wordo viola. Mi yiunan no por a stroba ningun investigacion. Pero pa presiona Paul a haci esey, mescos ora cu nan a detene mi sin tin nada contra mi.”
“Señor Hues, bo no ta kere cu tur esey tabata un castigo grandi caba prome cu e caso a yega den Corte,” Paesch a puntra den sala dilanti e Magistrado.
