Medinanan preventivo pa hende grandi kontra Corona Vírùs

287

En konekshon ku a konstatá kasonan di Corona Vírùs na Kòrsou, gerensia di Fundashon Birgen di Rosario a disidí djabièrne último pa tuma medidanan èkstra pa ku e grandinan.

Fundashon Birgen di Rosario (Birgen) tin personanan di edat ta biba den su lokalidatnan Huize Welgelegen (Habaai), Nos Lanterno i Richardushuis. Teniendo kuenta ku e personanan aki ta e grupo di riesgo pa desaroyá malesa severo, dado kaso nan keda infektá ku e Corona Vírùs, a tuma desishon pa limitá bishita den su lokalidatnan. Entrante 16 di mart 2020, Birgen ta restringí e dia i ora di bishita na solamente djadumingu entre 10 pa 12’or. Kasonan spesífiko di bishita mester palabrá ku hefe di lokalidat i/òf mènedjer di kuido (por ehèmpel un kliente ku ta terminal).

E fundashon ta pidi pa solamente un miembro di famia bishitá e grandi. E miembro di famia ku ta bishitá e grandi no mester ta ehersé un funshon públiko ni un funshon den salubridat, kaminda e ta drenta den kontakto ku hopi hende. E no mester ta un persona ku ta bai den aglomerashon di grupo di hende. Birgen ta pidi bishita pa evitá kontakto físiko ku e hende grandi i keda na distansia. Bishita mester laba man ku habon di forma profundo na entrada i mester bisti e tapaboka “mondkapje” promé ku drenta e lokalidat. Ademas, gerensia di Birgen no ta permití bishitantenan pa drenta den kamber di kliente. No ta permití mucha den nos lokalidatnan.Fundashon Birgen di Rosario a disidí pa sera Pasadia Mi Amparo pa un siman di 16 di mart te ku 20 di mart 2020 en konekshon ku e situashon rondó di Corona Vírùs. Pa mas tarda djabièrne 20 di mart 2020, maneho di Birgen ta informá famia di klientenan di Pasadia Mi Amparo ki dia e fasilidat aki ta habri bèk.

Comments

comments