Medidanan kontra di pueblo di Kòrsou lo oumentá pobresa

No tin mas surdu ku esun ku no kier tende i nos tin mas siegu ku esun ku no kier mira. For di 2013 bin ariba Gerrit Schotte lider polítiko di MFK a bin ta atvertí e diferente gabinetenan ku a goberná Kòrsou ku e medidanan ku nan a bin ta tuma lo bai hiba Kòrsou na un kolèps finansiero i ekonómiko i esei ta loke ta sosodé aktualmente.

Awe 6 aña despues nos por tuma nota ku e vishon ku kual Gerrit Schotte a mira resultado di e medidanan aki ta manera su persona a bin ta indiká. Un gobernashon sin kontrol riba finansa públiko, un presupuesto for di balansa, kriminalidat ku a keda oumentá i ku kada dia ta mas violento i un pobresa notabel den nos barionan.

Komo representante di pueblo den Parlamento, ami señora Jacinta Constancia a partisipá siman pasa djaweps na un presentashon organisá pa Soladaridat Sindikal kaminda e eminensia señora Jeannette Juliet Pablo, a duna un presentashon riba “Impakto di Medida riba e Area Sosial”. Esaki relashoná ku e medidanan anunsiá pa Minister Gijsbertha i kua lo tin un impakto hopi grandi riba nos bida diario.

E presentashon aki a konfirmá e pensamentu ku MFK tabatin for di su inisio, ku mester ataka pobresa i kalidat di bida den nos barionan. Esaki tabata motibu ku gabinete Schotte a firma for di aña 2012 un akuerdo ku “Union Europeo” pa a pone fondonan disponibel pa halsa kalidat di bida den diferente barionan di Kòrsou. E proyekto aki a hiba di nòmber “Plan Nashonal pa Desaroyo di Bario” i durante di añanan ku a sigui lo mester a kontinuá ku implementashon di e proyekto aki den barionan aki na Kòrsou. Esaki tabata un plan di gabinete Schotte ku vishon riba futuro i pa manera ya menshoná halsa kalidat di bida den barionan marginal.

Pero ku e medidanan no bon pensa i pa komplasé Hulanda i CFT di parti di gabinete Rhuggenaath lo no logra pa halsa kalidat di bida den barionan i e medidanan aki lo bai ta devastador pa tantu e klase medio komo esnan mas marginá den nos komunidat. Si implementá e medidanan aki manera presentá Kòrsou lo bai konosé un porsentahe haltu di pobresa i Kòrsou lo konosé riku i pober, ya lo no tin klase medio mas. Bida di nos hendenan lo ser afektá negativamente den hopi sentido di palabra.

Nivel di strès lo subi drástikamente serka mama i tatanan di famia, loke lo afektá hinter un famia, forsa di kompra lo bai atras i ku konsekuensia ku mas kompanianan lo sera nan porta i mas hende lo pèrdè trabou. Empresa Chikí ku ta e ader mayor di nos ekonomia lo haña un gòlpi formal ku konsekuensia ku e medidanan presentá lo no bai generá e sènnan ku mester pa tapa e burakunan ku debí na mal gobernashon a wòrdu krea riba presupuesto.

Nos no mester lubidá ku un défisit ta ora bo ta gasta mas sèn ku bo ta risibí, si mi sa ku tur luna mi ta risibí mil florin i mi ta gasta mil sinkushen florin tur luna, esaki ta nifiká ku mi a ta krea tur luna un défisit den mi presupuesto. Ta esaki gabinete Rhuggenaath a bin ta hasi gasta mas sèn ku nan ta risibí den kaha di gobiernu i awe nan ta kere ku pueblo mester paga pa e eror aki ku nan a kometé dor oumentá diferente belasting loke lo no solushoná e défisit ku tin aktualmente.

Pero e medidanan aki lo bai krea un eksploshon sosial i manera ya nos a menshoná e medidanan aki lo oumentá pobresa mas tantu. Nos ta spera ku Minister Gijsbertha lo skucha e gritunan ku ta saliendo for di tur huki di Kòrsou i ku ta mustra ku e medidanan aki no lo trese solushon.

Minister Gijsbertha “Lo cortés no qiuta lo valiente”

Kòrsou, 24 di mart 2019

Na nòmber di frakshon di MFK

Jacinta Constancia

Miembro di Parlamento