Despues di e reunion di alto nivel cu a tuma luga entre Venezuela, Aruba, Reino y tambe Corsou, Prome minister Evelyn Wever-Croes a dirigi su mes na prensa cu e ultimo desaroyonan. Presente na e reunion aki tabata diferente minister, pero tambe representante di Venezuela, di Aruba, di Corsou y den nomber di reino, Embahador di Reino.
A trata varios tema, a trata practicamente tur e issuenan si por yam’e asina, cu tin ta hungando den e temponan aki. E reunion a bay den un esfera hopi positivo, hopi constructivo. A toca temanan di entre otro e contrabando, of e productonan cu Venezuela ta considera como productonan cu no ta legal pa exporta y a haci palabracionnan riba e reglanan cu ta conta pa importacion na e diferente paisnan aki banda.
Tambe naturalmente a toca e tema di e pasaheronan cu a keda pega den e dianan aki y a yega na algun palabracion riba esey. Na final a yega na un documento den un draft, cu e partidonan cada un ta hiba bek na nan cas, pa discuti y pa purba di yega na otro y firma e acuerdonan aki mas pronto posibel.
A haci tambe palabracionnan riba vervolg traject, e trayecto cu tin cu sigui ainda. Palabracionnan a wordo haci caba riba Douane, cu lo tuma luga otro siman diahuebs. Prome cu esey ta spera cu por yega a firmamento di e documento cu e palabracionnan aki.
Mientras cu e documento no ta firma, sancionnan ta keda na vigor. Esey ta nifica cu e medidanan di parti di Venezuela tocante di e trafico aereo y maritimo entre Venezuela, Aruba, Boneiro y Corsou, ta keda vigente. Nan a priminti si cu nos hendenan no ta keda pega y cu awe atrobe tabata tin vuelonan despues di oranan di merdia, pa trece nos hendenan bek.
E reunion aki tabata uno maratonico, den cual den un esfuera hopi optimista, a pone e liña den direccion positivo pa yega na e solucionnan. A haci cierto palabracionnan cu nan y e firma real ta wardando riba dje. Pa e ora e medidanan imponi pa Venezuela ta wordo lanta. E reunion a caba pa awe, pero cada pais ta hib’e bek na su base pa asina por yega na e documento cu por wordo firma.