Awe 16 di òktober 2020 ta hasi eksaktamente 3 aña di mi intervenshon komo Parlamentario pa Pais Kòrsou den e komishon di Reino i Asuntunan eksterior di Gobièrnu Hulandes i logra pa formalmente inkluí e Parlamentonan di Kòrsou, Aruba i Sint Maarten den e delegashon di Reino Hulandes pa Nashonnan Uní.
Pa mas ku 68 aña Reino Hulandes su Parlamento a keda representá na Nashonnan Uní sin representashon di Parlamentarionan di eks Antia Hulandes. Tampoko despues di 10.10.10. nos no a haña representashon den e delegashon di Reino Hulandes pa Nashonnan Uni. Tres aña pasa nos a logra pa haña representashon di nos Parlamento den e delegashon di Reino Hulandes pa Nashonnan Uni. Esaki tabata e momento ku Reino Hulandes a haña asiento den prestigioso “Veiligheidsraad” di Nashonnan Uní, danki na nos Parlamentarionan Karibense ku a lobby aktivamente serka nan koleganan di Parlatino.
