Mc William: Hustisia mester aktua di un forma rápido i ku man duru kontra di maltrato di hende muhé

337

Ku hopi repudio nos por a tuma nota komo hende muhé i ser humano kon un abusador ta agredí un hende muhé dilanti di un supermerkado den fin di siman ku a pasa.Ta un realidat ku Kòrsou tin algun hende hòmber ku ta usa nan forsa komo hende hòmber i agredí hende muhé físikamente manera nan ta haña ta bon.

Último tempu tambe nos ta tuma nota ku e agreshon kontra di hende muhé den e pais aki ta kresiendo drástikamente i ku algun di nan ku resultado fatal pa e hende muhé víktima i nan yunan ku ta keda marka dor di agreshon verbal i físikamente dor hende hòmber pa semper.

Un di e fenómenonan ku a bin ta lanta kabes ,ta hende hòmbernan ta maltratá hende muhénan ku nan ta biba ku ne di kual ta dependé di nan finansieramente. Algun di e hòmbernan nan aki tambe ta hasi mal uso ku algun di e hende muhénan ku ta indokumentá den nos pais i no tin ningun protekshon di hustisia pa nan. Banda di esaki demasiado biaha e hende muhé no ta haña e atenshon ku nan mester haña na Polis na momento ku nan hasi un denunsia kontra di agreshonnan i ta bagatelisá esaki i asina e víktimanan ta skohe pa karga nan sufrimentu nan so sin ku hustisia por hasi su trabou i protehá nan.

Mester bini un un departamento den e sektor hudisial di train spesialmente pa atendé ku personanan ku bira víktima di maltrato kontra hende muhé. Ainda den nos memoria kon algun siman pasa un señora di edat a keda abusá seksualmente na Klipstraat i despues di akto baho aki e víktima a kana na pia bai warda di polis na Otrobanda pa denunsia esaki ,pero a haña un baño di awa friu kon e la wòrdu trata i despues manda kas sin ningun klase di atenshon nesesario pa ku su situashon. Ku konsekuensia ku e víktima su trouma a bira unu dòbel i ta sinti ku no tin hustisia pe na e momento frágil aki. Komo hende muhé ,mama ,ruman,yu nos por i no mester aseptá e maltratonan aki ni pa nos ni pa otro nan.