Maltrato y abuso di mucha sigur ta algo cu ta condenabel, sea cu e ta wordo haci pa un familiar of cualkier otro persona.
Pero e hecho cu un mucha ta wordo maltrata na scol, un instituto caminda cu e mayor of mayornan ta entrega nan yiu(nan) pa nan ricibi un educacion, ta algo cu sigur ta inaceptabel.
24ora.com, e website di Pueblo tabata na cas di famia Brown. Nan a haci un denuncia publico, hunto cu algun mayor y mucha, cu ta birando victima di maltrato. Ta bay asina leu cu hasta tin un di e muchanan cu tin dos luna sin bay scol. Pero, mayornan a cana un caminda largo y ainda sin solucion. A combersa cu nan y a conta kico ta nan preocupacion. Despues di a cana hopi caminda, a yega cerca 24ora.com pa bisa kico ta nan preocupacion.
Un di e mayornan a conta nos cu un di e docentenan, meneer Niels, ta maltratando su yiu basta pisa. Ora cu a deal cu e cabesante di Colegio Santa Filomena, e ta bisa tur ora cu ta pa prome biaha e ta scucha e cosnan aki y cu nunca e sa di nan. 
Esaki siendo cu tin hopi mayor mas cu tambe tin e mesun problema cu e maltrato cometi door di e docente en particular aki y nada no ta wordo haci. Tabata tin un biaha cu e director di SKOA y un persona di Departamento di Asuntonan Social a mas of menos tuma rienda, pero e mama aki no a mira fruto.Nada no a wordo haci cu e docente, kende ta traumatisando e muchanan. Tin diferente mucha di diferente edad, den diferente aña escolar, cu ta papia di esaki y e cabesante no ta haciendo nada.
E yiu ta keda sin bay scol pa e motibo aki. E ta traumatisa y a wordo maltrata severamente. En bes di a haci algo cu e docente, e yiu ta keda cas. Loke e mama ta wak ta cu e mucha ta tiki mala mucha. Si un mucha ta mala mucha, no ta duna ningun hende derecho pa pone man riba dje. Si e mayornan atende cu e yiu, nan tin cu deal cu tur tipo di hende. Pakico scol si por pone man di e forma ey riba un mucha.E mama ta pidi husticia. Su yiu no ta bay scol, pasobra e ta spanta y traumatisa y SKOA ta bezig ta scondiendo kico ta pasando na Colegio Santa Filomena. No ta e mama aki tin e problema aki. Tin basta mayor cu ta pasa den e situacion aki.
E docente ta bully e muchanan, ta yama nan pa tur sorto di nomber y esey no ta bon. E ta pone e muchanan di e klas pa bully e otro muchanan. E ta lantando e muchanan cu un auto estima hopi abao.E mama ta denuncia cu tin varios otro maestra cu sa kico ta pasando, pero no ta move un dede pasobra ta nan colega. E docentenan mester t’ey pa e muchanan y no solamente pa e salario. Nan mester t’ey pa yuda e muchanan den un situacion dificil.
E mama ta canando su caminda y ta hayando su mes cu varios di e docentenan ta tum’e como enemigo. Loke e mama ta duel tambe ta cu el a perde tur confiansa den SKOA. Nan a laga hopi di desea. Nan ta haci manera cu nan ta atendiendo e asunto, pero ta mas bien scondiendo e asunto. E asunto aki a bay asina for di man cu e mucha a wordo maltrata y hasta e mama a bay JKZP, unda cu nan a duna un declaracion.
E mama tambe a bay sindicato SIMAR y tambe Inspectie. Pero aparentemente nada no a wordo haci. Contesta cu el a haya for di SKOA ta cu nan lo investiga e caso. Nunca nan a tende di e docente. Loke e mama kier mustra SKOA, Gobierno y tur concerni, cu no ta e so y su yiu a pasa aden, pasobra ta esey nan ta lag’e sa, cu nan no sa.
E kier mustra tambe cu e caso aki ta bay bek hopi aña pasa. E ta spera tambe cu e otro mayornan cu a pasa aden, nan cuminsa lanta riba y denuncia. Un cos ta un hecho, no mag di pone man riba e mucha.
