E decision di Minister di Enseñansa pa cera VWO 3 na San Nicolas tin docente y mayornan disgusta. Un peticion a sali pa tur mayornan, principalmente esnan cu tin yiu na Colegio San Nicolas, pa pasa firma un carta di protesta cerca Juffrouw Doris. E motibo cu el a cay asina den mal tera ta pasobra e decision aki a wordo tuma di un dia pa otro.
P’esey docente y mayornan a cera cabes y a dicidi cu lo firma un carta di protesta pa manda pa e mandatario.
Nan ta sinti cu e ta un mal hecho cu awo, dos siman prome cu scol cera, ta bini cu un decision asina drastico. Colegio San Nicolas tin hopi aña luchando pa haya VWO completo pariba, pues for di 3de te cu 6de VWO.
Y nan tin alumnonan cu ta potencial pa bay VWO y e scol kier brinda esey, tanto HAVO como VWO. E docentenan kier guia e alumnonan pa VWO 3 te na e recta final.
Ta pa e motibo aki mes, e docentenan ta pidi pa mayor, voogd, verzorgers pa pasa firma e carta di protesta diamars, 25 di Juni, 2019, prome cu 3’or di atardi cerca Juffrouw Doris.
Ta di spera cu e accion di firma aki, nan por pone un paro na un decision cu siguramente por perhudica e alumnonan.
