Mayoria trahado na Aeropuerto afiliando na FTA

Diamars awor dia 27 di augustus 2019 ta tuma luga e referendum pidi pa Sindicato “Federacion Trahadonan di Aruba” (FTA) na Aruba Airport Authority NV. Mas o menos 100 trahado a afilia recientemente na e sindicato, demostrando cu nan kier representacion di FTA. Pero internamente tin un bataya pisa pa miemresia entre Sindicato STA, cu awor ta representando e trahadonan y FTA, cu ta drentando awo, si nan gana e referendum otro mañan.

Na tur tin 173 trahado na Aruba Airport Authority NV cu tin derecho di voto, pues cu por vota den e referendum pa por conta riba representacion sindical. Di acuerdo cu reglanan impone dor di Mediador di Gobierno, si Sindicato FTA logra 87 voto na fabor, ya caba el a gana y mesora por cuminsa representa e empleadonan di e compania priva, di cual Gobierno ta 100% doño. Entretanto FTA tin no menos cu 98 miembro nobo na AAA, pues trahadonan cu a afilia na FTA prome cu nan a gana e referendum mes! Cu esey e sindicato mas grandi di Aruba ta sigura cu nan lo sali vencedor durante e referendum.

Si tene cuenta cu tur esunnan cu a afilia na FTA caba, ta estima cu sindicato STA lo mester tin mas o enos 60 pa 70 miembro activo den Aeropuerto. Esey no ta suficiente pa por representa e mayoria den e compania, cu ta para net na vispera di negosacion pa un contracto colectivo di trabou nobo.

Na luna di juli ultimo, Mediador di Gobierno a publica den medionan di comunicacion local, cu tin oportunidad pa tur sindicato cu ta desea representacion na Aruba Airport Authority NV lo mester inscribi nan mes na e referendum. Sinembargo, sindicato STA a opta pa no haci esey. Di otro banda, durante un reunion cu u grupo chikito di trahadonan, a informa nan cu si acaso FTA no logra mayoria den e referendum, cu automaticamente STA lo sigui representa e trahadonan toch. Esey no ta cuadra cu berdad, segun un carta cu FTA a saca na tur trahado di Aeropuerto.

Loader Loading...
EAD Logo Taking too long?

Reload Reload document
| Open Open in new tab

Download [325.58 KB]

Sindicato FTA actualmente ta e sindicato mas grandi di Aruba cu mas di 3 mil miembro, afilia na mas di 50 compania unda nan tin un CAO vigente. Contrario na hopi otro sindicatonan, nan tin un oficina cu henter un ekipo di profesionalnan riba varios tereno pa por sostene, guia y representa e trahadonan dne tur nan necesidadnan. Asina por ehempel nan ta un di e poco sindicatonan, cu den nan tarifa mensual di 33 florin pa luna, ta inclui representacion huridico den caso di un disputa legal den Corte. Mayoria sindicato no por ofrece esey, cu ta haci cu e miembro ta core cu gastonan halto di abogado den caso cu mester hiba e compania unda nan ta traha dilanti Hues.