Ayera diadomingo mainta nos a start un encuesta entre e 102,592 siguidonan riba nos pagina di Facebook, relaciona cu e discusion cu tin pa cu Toque de Queda. Un total di 11.400 usuario a participa y a vota. Por a scoge entre lag’e e TdQ un tempo pasa of pa elimin’e inmediatamente. Un mayoria a vota na fabor pa mantene e situacion manera cu e ta, pues pa no habri e posibilidad bek pa por move rond durante oranan di anochi.
E resultado tabata cu 63% ta ba fabor pa laga e Toque de Queda manera cu e ta awo, contra un 37% cu ta boga pa elimin’e inmediatamente. E encuesta tabata net un dia, pues durante 24 ora por a vota.
E discucion a lanta cabes mas den fin di siman ora Orden di Abogadonan di Aruba a reta legalidad di e decision aki. Tambe ta sinti cu e proporcionalidad no ta cuadra, pasobra a uza un medida mucho pisa pa atende un crisis, siendo cu no tin prueba cu anochi e chens pa contagia cu Coronavirus ta mas cu den dia. E abogadonan ta sinti cu a implementa e medida aki, bou capa di Coronavirus, pero cu meta pa combati criminalidad.
Den e comentarionan cu a sigui den e encuesta, ta sinti cu mayoria usuario di 24ora.com ta sinti cu eliminando e TdQ cu atrobe lo mira un aumento di consumo excesivo di alcohol, accidente, pelea y ladronicia. Nan ta sinti cu dor di e TdQ mas ciudadano ta sinti nan mes mas sigur.
