Mayoria di esnan COVID-19 positivo ta hende homber

1288

Den e conferencia di prensa di Gobierno riba coronavirus,a duna resultado, pero tambe a haci analisis di e casonan cu tin aworaki di COVID-19 na Aruba. Mayoria caso ta di contagion local y mayoria di esnan contagia ta hende homber.
Te cu awe nochi e website www.arubacovid19.org ta sigui mustra cu tin 55 caso, prome cu e conferencia di anochi. Informacion adicional cu Jurette Croes, Vocero di Salubridad, a splica cu a test 737 persona di 672 a sali. Tin pendiente pa resultado di algun test mas. No a menciona si nan lo ta cla pa awe ainda, of si ta 10 test cu tabata den duda. Banda di esaki, tin 1160 persona poni den cuarentena, y kendenan desde diamars ultimo ta wordo controla door di un Taskforce pa mira si nan ta keda paden. SI no haci esey, lo haya un boet.


Eugene Maduro, di Departamento di Salubridad Publico a haci un evaluacion di e cifranan cu tin disponibel te aworaki. Asina por ehempel, a constata cu e pashent di mas grandi tin 74 aña y esun di mas hoben ta 11 aña. E grupo mas grandi di esnan ta 30 pa 34 aña. E ta nifica 20.1% di tur e casonan confirma, ta di e grupo di edad mas vulnerabel (1/5) cu ta esnan di 60 aña of mas.
A recorda tur hende cu si un persona haci e test y sali, esaki no ta nifica cu bo ta immuun. Si bo sali pafo riba caya, bo por keda infecta.
Pa evita COVID-19 sigui laba man. E virus ta manera un bala di vet y cu habon e ta dirti y inactiva cu e no por haci daño mas. Tur e medidanan di precaucion tuma ta pa plama e infeccionnan riba un periodo mas largo, permitiendo un miho acceso, di un y tur afecta pa e virus, na e cuido medico na Aruba.
Te cu merdia tabatin mas cu 878 mil caso confirma na mundo di cual 185 mil a recupera. Tabatin 43537 morto. Di esnan infecta, 95% ta den un estado cu ta sufri di sintomanan “mild”.

Regional


Datonan regional ta mustra cu Republica Dominicana ta e pais cu mas caso active, sigui pa Cuba, Martinique y Guadaloupe. Rep. Dominicana ta e pais cu mas morto registra.


Local


Di e mas cu 7 mil personanan getest, rond di 7.5% di e total a test positivo. Mayoria, 53% di esnan positivo ta hende homber y 47 hende muhe.
Otro cifranan ta mustra cu 27% di esnan positivo ta debi na biahe (New York of Miami), o sea casi 3 di cada 10 persona. E positivonan di hende muhe ta di 30 pa 64 aña mientras cu e positivonan masculine ta di 25 pa 29 aña
Grupo 25 y 44 ta esun mas afecta, cu ta e grupo reproductivo cu ta move mas den comunidad. Esey ta pone cu e malesa por plama mas facil, 25.6 den sector di cuido, 28.2% den area di hospitalidad, 46% ta otro tipo di ocupacion.
Tin 4 caso severo pasobra nan a wordo hospitalisa, esun den ICU ta un homber di 46 aña y e ta riba respiracion artificial.
Mayoria di sintomanan cu e hendenan a haya tabata: tosamento, keintura, problema pa hala rosea, dolor di cabes y dolor di garganta. Casi 60% tin of tabatin tos seco, dolor di cabes, keintura, ta perde smaak, diarea, dolor di curpa.
Maduro a recorda cu e virus mester di droplet pa contagia y nan por sobrevivi entre 72 ora y cinco dia. E virus tin peso y no ta bay mas cu 2 meter ley y pa contagia mester tin contacto directo cu e droplets (e gotanan).