Tur aña tin un grupo grandi di studiante cu ta sali rumbo pa Hulanda pa continua cu nan estudio. Ora di termina esaki, mayoria studiante ta regresa Aruba pa contribui na e desaroyo di nan pais. Sinembargo, mayoria di e studiantenan aki tin un responsabilidad pa cumpli cune cual ta paga e placa cu nan a presta durante nan estudio (sea cu Aruba y/of cu DUO).
Pa yuda e graduado cu tin un prestamo di Aruba y alivia e peso aki, Gobierno a introduci na 2012 un incentivo pa e graduado cu regresa dentro di tres aña un rebaho di 30%. Na 2017 gobierno a tuma e iniciativa pa reinforsa e decision aki y subi esaki pa 35% cu riba e prestamo ta un suma considerabel.
Banda di esaki no solamente a enfoca riba e rebaho di e prestamo pero tambe a bin cu beneficionan fiscal pa tur graduado cu ta paga pa un prestamo. Esaki ta encera cu e graduado por reduci e suma henter te cu 10 mil florin y no solamente e interes manera tabata e caso anteriormente.
Awor e graduado cu a studia na Hulanda tin un extra beneficio mirando cu e por paga su debe na DUO directamente riba un cuenta di banco local y asina evita gastonan bancario extra pa manda placa Hulanda. Mi ta convenci cu e iniciativanan aki di Gobierno ta un estimulo pa atrae nos profesionalnan di exterior pa bin bek Aruba pa contribui na desaroyo di nos Isla. Ami ta kere den iniciativanan creativo pa trece nos yiunan di tera bek Aruba y mi mes tambe lo sigui bin cu iniciativanan asina pa stimula poder di compra pa nos hobennan profesional.
