Enseñansa, Edukashon i Formashon di nos hubentut ta un prioridat di akuerdo ku e Akuerdo i
gobernashon. Minister Alcalá-Wallé den e akuerdo aki a bai di bishita na St. Jozef VSBO kaminda Fundashon Material pa Skol (FMS) ta preparando e bukinan ku mester ta disponibel pa nos hóbennan.
Minister sra. M. Alcalá-Wallé i Sekretario-General sra. Sahayra Braun-Nisbet a bai personalmente pa tuma nota di tur e preparashonnan. Representantenan di FMS den persona di sra. Mirelva Albertus, sra. Gerica Felix i sra. Jalrika de Windt-van Ommeren a duna un splikashon di tur e trabounan ku FMS ta hasiendo entorno di e parti di Buki. FMS tin un tim spesial ku a kuminsá traha for di 23 mei riba e preparashon di e bukinan pa aña
eskolar 2017/2018. Nan a kuminsá ku ‘scan af’ tur e bukinan. Esaki ta nifiká ku nan a kita e buki for di nòmber di e alumno anterior. Ta premirá ku pa 15 ougùstùs 2017 ta kaba ku e trayekto di ‘scan aan’. Ku ta nifiká pone e bukinan awor riba nòmber di e alumno nobo pa e aña eskolar nobo aki. Ora esaki ta kla nan ta pone tur e bukinan huntu segun e klas di kada skol. Mester remarká si ku a topa ku basta buki ku a keda entregá tabata destruí i no por hasi uso di nan mas.
Esaki ta un desaroyo indeseá ku nos mester ban pone mas atenshon na dje komo ku kada aña eskolar esaki ta trese mas gastu pa motibu ku no ta kuida e bukinan. Minister Alcalá-Wallé a tuma bon nota di esaki i alabes ta hasi un yamada na kada hóben i nan mayornan pa kuida e material ku Gobièrnu ta paga i tambe tene kuenta ku otro alumnonan tambe mester hasi uso di esaki den futuro. Pues e preparashon ta kanando konforme e skema pa asina kada alumno por haña nan buki pa e aña eskolar 2017-2018. Ku esaki Gobièrnu di Kòrsou ta indiká ku e desaroyo di kada alumno ta di importansha pa asina nos hubentut realisá e máksimo potensial konforme e Akuerdo di Gobernashon di nos pais Kòrsou.
