C2 Civil & Construction ta e compania encarga pa ehecuta un proyecto ambicioso y innovativo pa Aruba. Construi un brug bou tera, pa e huespednan di Embassy Suite por crusa y yega e beach na otro banda di caminda sin ningun peligro.
Awe materialnan cu tabata pendiente pa construccion di e “pedestrian tunnel” a yega e sitio di construccion na Embassy Suites. Nan tabata na Barcadera y cu escolta policial y ayudo di ATCO a hiba e materialnan te na e hotel.
Egbert Groenewegen, kende ta Managing Director di e compania, a splica cu e proyecto un retraso chikito, pa loke ta e cobamento. Esaki ta pa motibo cu un parti di e tunnel ta pasa bou di tereno cu ta pertenece na gobierno, otro ta di Watty Vos Boulevard y e otro ta di Embasy Suite. Mester yega na un acuerdo huridico cu ta duna nan permiso pa coba riba nan tereno.
Un otro reto ta cu mester a move e caminda cu e tunnel ta pasa na cierto area, pa evita cu ta mishi of corta matanan existente. “Nos a traha respetando naturalesa. Nos no a kita ningun mata,” el a enfatisa.
E compania ta kere cu e parti principal di e construccion ta keda cla e aña’ki ainda, pero e proyecto mes lo finalisa otro aña.
Construccion di tunnel, y su diseño, tabata un reto. Esaki prome tunnel den historia den Caribe cu a construi un tunnel bou tereno. E tunnel ta hiba e huespednan for di e hotel te na e beach. Den e construccion a tene cuenta cu yobida. “Awa no ta drenta facil. Pero si awa drenta, tin dos area cu ta pomp e awa bek pafo,” el a enfatisa.
