Mata hamber cu harpun di pisca?

2850

Mi ta hinca mi mes den e debate como un ex-piscado cu harpun. Ami tabata un di e prome Arubianonan cu a practica spear fishing na Aruba. Esaki tabata na 1949, hopi aña pasa! Mi ta kere cu 90 % di esnan cu ta lesando e articulo aki ni sikiera a nace ainda.

E tempo ey, spear fishing tabata djis un otro deporte nobo cu algun Arubiano a gusta. No tabatin protesta contra di dje. Te hasta, “Lorito Real”, e semanal di “Pachi” Jonkheer a haci un caricatura di mi cu mi ekipo di spear fishing. M’a laga spear fishing pa mi por a dedica mas tempo na baseball.

Aparentemente den añanan cu a sigui, spear fishing a bira enemigo di ambientalistanan. Hopi estudio haci pa diferente entidad cientifico renombra mundialmente a conclui cu piscamento cu harpun ta dañino pa nos ecologia. Piscadonan cu harpun ta scoge un pa un pisca cu e kier gara y piscadonan cu harpun, entre otro, ta mata e piscanan mas grandi cu ta recrea otro pisca grandi, lagando e mas chikitonan so. Ningun otro forma di pisca ta ofrece e piscado e selectividad manera piscamento cu harpun.

Parce cu Minister di Husticia, Andin Bikker y Minister di Transporte, Telecomunicacion y Sector Primario, Chris Romero, ta haya nan mes den un situacion dificil pa haci un decision similar na hefenan di estado cu mester scoge entre opcionnan causa pa COVID-19. Ta bay cu ciencia, of ta scoge pa nan antoho (capricho?). Ta bay di acuerdo pa permiti piscamento cu harpun of ta tene nos pais na convenionan internacional cu ta producto di e estudionan cientifico.

E argumento di esunnan cu kier elimina e prohibicion pa algun piscado sin trabou cu ta “pasando hamber” por busca cuminda cu su harpun no ta convence mi. Nan mester busca un harpun, locual lo costa nan hopi mas cu un bol di liña y algun hanzue. Nan por pisca riba barancanan sin bay den un boto. Y si nan a tene nan mes na nos leynan, nan y nan harpun bieu mester ta hopi frusto. 

Manera redaccion di un corant a remarca, tratadonan internacional no conoce suspension temporal. Mi ta kere cu Aruba mester bay cu ciencia y no mishi cu e tratadonan internaconal cu a bin na vigor despues di hopi studio cientifico. Mi no ta kere cu un supension temporal ta e solucion pa nos piscadonan cu ta “pasando hamber” y tampoco lo beneficia pueblo di Aruba.

Clyde Harms