Esaki sin duda ta un bunita oportunidad pa sr. Eric Barry kende ta un persona cu pa hopi aña a dedica su mes na e deporte di combate y na nos atletanan di taekwondo na San Nicolaas. E tin su propio scol di taekwondo cu ta San Nicolaas Taekwondo Center. Den pasado Sr. Barry a arbitra den varios torneo local y internacional esaki den nos region y continente mientras awo pa prome biaha un mundial. E campeonato mundial ta conta cu un participacion di 100 pais e dianan 24 pa 27 di augustus unda Sr. Barry lo referee varios pelea durante e mundial aki. Despues di Grand Master Chaco Cornelio y Marylu de Veer, Sr. Eric Barry lo bira e di tres Arubiano cu lo referee durante di un mundial di taekwondo.
“Mi ta masha contento di por a haya e oportunidad aki pa para referee na un campeonato mundial di taekwondo cadet na Egipto. Esaki sigur ta un reconocimento pa e trabou desplega pa añas den e mundo di taekwondo. Ora bo bay un competencia di e magnitud aki caminda miles di hende lo wak bo via television y internet ta Aruba nan ta mira paso esey ta sali tur caminda. Mi ta orguyoso di por representa Aruba como referee pa prome biaha pami na un mundial. Probablemente lo mi para referee den varios pelea mirando cu ta hopi atlega mes lo competi. Mi lo hasi mi best manera semper”, sr. Barry a bisa orguyosamente. Na e mundial di taekwondo cadet mas cu 100 pais di tur parti mundo lo competi na dje cu mas di mil atleta na Cairo, Egipto.
Lotto ta masha orguyoso di por a yuda e deporte di taekwondo y den e caso aki sr. Eric Barry kende a haya un oportunidad grandi pa briya den un mundial na Africa. Aruba mester duna e reconocimento na nos hendenan local cu un bes mas ta demostra cu trahando duro nos por logra cosnan grandi. Nos Ministro di Deporte Dr. Alex Schwengle hunto cu Lotto pa Deporte ta desea Master Eric Barry hopi exito den e challenge aki. Lotto un biaha mas ta cambia bida.
