Awe mainta a habri cu un otro ciudadano cu a bin dilanti pa presenta su preocupacion riba e situacion cu e cuido medico riba nos isla. Lilia Solognier ta conta cu e situacion ta uno deplorabel.
Su experiencia ta cu drs. M. Pieterse- Clement (Huisarts) situa den Medical Center Eagle na Caya Punta Brabo. Lilia ta conta cu e ta wardando pa hopi tempo caba di por logra haya un consulta y te ainda nada.
Algun luna pasa, e docter a atend’e y a detecta cu e tin un infecion urinaria, a ricibi receta cu remedi y for di 31 di juli ta den contacto, caminda el a haya pilder, crema pero te ainda su situacion medico no a mehora. Te ainda e tin e infeccion.
Situacion a bira tenso cu e docter
Un pregunta a bin dilanti di parti Lilia, si no ta favorabel pa paso over na un gynecoloog pa laga un specialista observa su caso. Docter Pieterse-Clement a duna di conoce cu e mes ta fungi tambe como gynecoloog. Cu e tin mas di 15 aña di estudio como gynecoloog y si acaso e tin cualkier duda den su profesion, ta miho cambia di docter.
Awe mainta ta presenta na consultorio di docter, despues di a pasa henter anochi cu hopi dolor y molestia di e infeccion cu ainda ta afectando. Pa su sorpresa na e consultorio nan ta puntra dicon e no a cambia di docter ainda.
Como pashent, e ta sinti cu ta un trato inhumano, cu no ta atende su persona na momento di enfermedad cu ta buscando un solucion pa su estado di salud. Mientrastanto nan a mande varios caminda , incluyendo eerste hulp caminda nan a informe cu su situacion no ta urgente. A bay su ginecoloog cu tampoco no por a atende. Lilia ta comparti su disgusto pasobra ta bisa cu su situacion no ta urgente pero como pashent, ta e persona ta sinti ( dolor, molestia).
Falta di etica
Lilia Solognier ta disgusta, e ta un falta di etica cu no ta tene cuenta cu e situacion di e pashent, cu no ta tene cuenta cu e dolor cu nan ta aden. E no ta un persona cu ta constantemente na docter, alcontrario no ta gusta bay docter. E trato ricibi tabata deplorabel, e docter te asta a sali y practicamente core cu ne for di sitio y bise pa e haci locual cu e kier. Pa locual ta e situacion en general, un suplica ta bay na e mandatario riba e tipo di trato na pashent aki. Cu e ta den su derecho di haci pregunta, tambe scucha y cu ta pesey nan ta traha cu hende. Segun Solognier un veterinario ta trata su bestianan miho cu e docternan cu ta trata ser humano. Lilia ta enfatisa cu e no ta un persona cu ta bin docter pa molestia pero den e caso aki e ta malo y como tal e ta busca pa nan atende cu ne. Tin di compronde cu e molester y dolor ta traha riba nervio y por desespera ken cu ta.
Hopi ta esnan cu nan a neglisha, cu dolor fuerte y cu na final a bay nan cas y fayece.
Opcion cu ta mira awo ta pa cambia di docter, cu tabata e intencion for di inicio, pero na e momento nan aki no tin luga na e otro docternan. A otorga mientrastanto un verwijsbrief pero lastimamente no tin apunta cu ta un caso di emergencia, ni tampoco di kico ta trata e situacion y como tal no ta haya atencion a corto plaso. Despues cu a mande varios caminda, niun caminda e por a ricibi ayudo medico pa su situacion y niun hende ta haci nan mes responsabel.
