Mas victima a denuncia Rudy Carti: A prolonga su detencion!

5082

Diabierna ultimo, dia 12 di februari, fiscal di Ministerio Publico a pidi y hues comisario a bay di acuerdo pa prolonga e detencion di e conocido masahista Rudy Carti cu un maximo di 60 dia mas den prizon na KIA. Ta sospech’e di ta envolvi den un “zedenzaak” cu un di su clientenan. E reto p’e awor ta, cu despues di su detencion y cu e caso a haya publicidad, a aparece mas victima na husticia cu a duna algun keho bastante similar. Ta teme cu tin mas hende muhe cu tambe a pasa den e mesun mal experiencia, pa cual Ministerio Publico ta invita nan tur pa entrega un keho oficial ainda.

Acusacion: Masahista maniak

E damanan cu a presenta na recherche a describi un scenario di cual mayoria tabata similar na otro. Esey ta mustra cu e masahista tin un “modus operandi” cu entretanto a bira conoci bou di su clientenan. E ta bisti su pechi di masahista pa por sacia su sed maniak, pa cual awor a hinc’e den un problema serio cu husticia. Es mas, tin di e victimanan ta raporta cu ta for di basta aña pasa caba e casonan aki a tuma luga, mientras cu otronan ta casonan bastante recien. Pero tur ta bay bek na un acto inmoral, cu no ta permisibel pa ley y ta condenabel penalmente pasobra ta atacha e integridad di curpa di e ser femenino.

Mas cu djis inmoralidad

Desde diabierna 15 di januari a detene Carti y a encarcel’e pendiente un investigacion andando relaciona cu un acusacion contra dje di inmoralidad. Locual ta conoci te ainda ta cu recherchenan di Jeugd en Zeden Politie (JZP) e yega su cas na Mahuma mas di un luna pasa y a bay cu ne riba ordo di Fiscal. Mientras cu e intencion tabata pa investig’e pa inmoralidad, a resulta cu a topa cu un otro misterio. Parce cu durante e “inval” di polis, ora cu a busca pa yega na material di prueba den su cas, cu alabes ta su negoshi tambe unda e ta duna masashi, a bin topa cu mas cu djis posibel prueba di e acusacion. A bin descubri cu Rudy Carti tabatin un suma grandi di placa efectivo den su cas. Ministerio Publico no a divulga ainda si ta trata aki di florin of dollars Mericano. Un cos si nan a confirma, e cantidad di placa efectivo ta mucho mas cu normal y como tal a lanta sospecho cu mester tin algo mas tumando luga den e cas y negoshi aki. 

Pa informacion mas detaya subi www.trempan.com