Mas siguridad di Polis awe na Consulado di Venezuela

Desde mainta trempan a start “Operacion Libertad” na Venezuela, pa cual ciudadanonan a cuminsa subi caya. Aki na Aruba un grupo a dicidi di aglomera na Consulado General di Republica Bolivariana de Venezuela, situa na Tanki Flip # 6 cerca di Ina’s Party Center. A pidi refuerso di Polis mesora pa garantisa trankilidad na e edificio diplomatico.

Na e sitio no por a constata ningun acto di agresividad of di disturbio. Hecho ta cu Venezolanonan na Aruba den su mayoria ta contra e Gobierno na mando, pa cual lo kier celebra si bin cambio den direccion politico di e pais. Polis na e sitio a alerta e grupo presente cu lo no tolera ningun forma di mal comportacion. E publico den cura a sigura Polis cu esey no ta e intencion, sino solamente demostra solidaridad na e pueblo Venezolano.

Mientrastanto Reuno Hulandes a saca un alerta na tur Hulandes na Venezuela pa no sali caya awe, debi na posibel disturbionan. Tambe ta conseha pa Hulandesnan no biaha awe pa Venezuela pasobra lo no por garantisa nan siguridad.

Polis lo sigui e desaroyonan di cerca pa evita cu e protestanan riba caya na Venezuela awe, lo por crusa lama y yega Aruba. Ta corda tur Venezolano biba na Aruba, cu nos isla ta biba den paz y tin un respet enorme pa e proceso democratico di tur pais. Aruba sigur no por ni kier mete den asuntonan politico interno di ningun pais soberano. Pesey ta importante pa e problemanan politico di e pais ey no stroba orden publico riba nos isla tampoco.

Comments

comments