Mas prueba entrega na Ministerio Publico contra Prome Minister Wever-Croes

Diamars 3 di december,i“FUNDACION ANTI ENRIKECEMENTO ILICITO y SALVAGUARDIA di PATRIMONIO NACIONAL i.o.” a entrega pruebanan adicional na Ministerio Publico relaciona cu e peticion haci dia 18 di november pasa, pa laga haci un investigacion penal contra di Prome Minister Evelyne Wever-Croes.

E motibo di e peticion na Ministerio Publico pa laga haci un envestigacion penal di Prome Minister Evelyn Wever-Croes, ta pa motibo di su desicion y accionnan den su funcion di minister cu ta monta na e delito di enrikecemento personal cu fondonan publico.

AVP cu mas prueba contra Prome Minister Evelyn-Wever Croes

Posted by 24ora on Tuesday, December 3, 2019

E peticion original cu a wordo entrega dia 18 di november 2019, a ensera sospecho y preuba di e siguiente delitonan: enrekisemento personal, abuso di poder, favorecemento ilicito, trato preferencial y fraude fiscal. E sospecho di a comete e actonan aki tin di haci cu e dunamento di contract preferencial na oficina di abogado Wever Croes y Ruiz pa trabounan na companianan estatal di su ministerio. E oficina di abogado aki ta e compania di e tata di prome minister Wever Croes y den cua e prome minister ta partner y ainda tin interes personal.  

E preubanan adicional cu a wordo entrega awe ta ensera entre otro:

  1. Preuba cu Prome Minister Evelyna Wever Croes mes ta duna encargo na miembronan di e oficina di abogado Croes, Wever & Ruiz, pa representa Pais Aruba y e compania estatal Utilities cu ta cay bou di su responsabilidad ministerial. Prome Minister Wever-Croes a nenga esaki rotundamente den publicidad. Cu e preuba aki e ta wordo desenmascara di ta gaña y ta nenga e enrikecemento personal.
  2. Mas preuba di e relacion entre Prome Minister Wever-Croes y e person escohi (“gehandpicked”) sr. Richard Godfried Eman, cu e a nombra of laga nombra como Presidente Commissario den diferente compania estatal y banda di nombr’e como candidato pa e funcion di Presidente Commissario di Utilities, ela encarga e persona aki temporalmente cu e maneho di Utilities;
  3. E caso pa cua Prome Minister Wever-Croes a busca e oficina di su tata, esta e retiro di e Director di Utilities, sr. Franklin Hoevertsz, ya a costa Utilities centenares di mil forin na costonan di abogado. Di e forma aki e oficina di abogado den cua Prome Minister Wever-Croes tin interes personal, ta wordo enrikece.

Den e carta entrega awe ta bolbe bisa Ministerio Publico cu lo entrega mas preuba pa sigui fortifica e caso di sospechonan fuerte aki.