Entrante diadomingo awo, lo bay tin un asina yama ‘avondlockdown’ y gobierno mantene scol habri te asina leu. Segun e fuentenan na Den Haag ta confirma diabierna, despues di informacion di NOS y otro medio. E medidanan aki lo ta activo durante por lo menos tres siman.
Segun e medio como tambe AD, e alumnonan for di 6de klas lo mester bisti tapaboca den gang pa evita e contagio di e virus.
HORECA, comercio no esencial (manera tienda di paña y mueble), sector cultural (teatro y cine), e luganan di transito manera museo y club deportivo mester cera nan porta entre 5:00 pm te cu 5:00 am.
Orario di ceramento di HORECA ya a delanta pa 8:00 pm, mientras cu comercio no esencial y profesion di contacto, manera pelukeria, mester cera nan porta pa 6:00 pm. Comercio cu ta suministra alimento basico, manera supermarket, por keda habri te cu 8:00 pm.
Cu e medidanan aki, gobierno demisionario ta sigui OMT (Outbreak Management Team). E expertonan a conseha e ministernan pa nan mantene scol habri, pasobra e ceramento di esaki por dificulta e desaroyo di e muchanan. Por lo tanto, gobierno lo haci bon pa uza e otro medidanan pa para e propagacion di e virus.
Scol ta sigui ta un fuente importante di infeccion. E ultimo cifranan semanal di RIVM a mustra cu nada menos cu 32 mil mucha entre 5 y 14 aña a infecta. Esey ta ilustra di un di cada cinco infeccion di e cantidad total (154 mil). Hopi infeccion por bay bek na scol durante varios siman.
Prome minister demisionario Mark Rutte y minister di salud publico demisionario Hugo de Jonge lo duna un rueda di prensa mas atardi unda cu nan lo splica e medidanan nobo. 24ora.com lo ta live cu e rueda di prensa aki awe tardi den careda di 2:00 pm. E noticia aki ta den desaroyo.
