Ta trata aki di un di e Comisariado miho paga di Gobierno, pues miho cu WEB, ELMAR, y AAA pero mesun cos cu Refineria di Aruba (RDA). Cada miembro di e Hunta di Supervision ta cobra Afl. 3600 pa luna, sumando un total di Afl. 43.200,= pa aña. Nan trabou ta pa representa e doño, Gobierno di Aruba, den reunionnan di directiva. Nan ta controla gerencia di e compania den nan reunion di Hunta di Directiva cu ta tuma luga 1 bez pa luna. E “vergoeding” aki ta mas cu salario di hopi hende cu ta traha henter un luna, 8 ora pa dia y 5 dia pa siman.
E decision di Gobierno di Aruba pa nombra ex-Minister Presidente Nel Oduber a percura pa hopi critica for di comunidad. Algun cara prominente di partido MEP mes a sali publicamente pa condena e practica aki di “Friends and Family”. Ta keha cu mientras un cantidad di hende ta pendiente un trabou, cu ta sigui yuda esunnan cu ya tin pensioen di biehes, di Parlamentario y di Minister caba tur luna.
Den Gobiernonan anterior, MEP a sufri hopi y a perde hopi voto pa e practica cu opositornan a cataloga como “Friends & Family”, pero ta mustra cu e generacion nobo di politiconan ta sigui e mesun liña di maneho. Den e mesun directiva di SETAR tin tambe e ex pareha, mama di e yiunan di Minister Chris Romero, esta Rubinah Bernadina, cu tambe ta representa su “ex” pa un gratificacion di Afl. 3600 pa luna. Esaki ta banda di su salario como docente, mas 25% pa ta “ter beschikking” di Minister Romero y di un otro gratificacion mas di mas o menos Afl. 2500 pa luna pa ta den Directiva tambe di Arubus. Ambos compania, esta Setar y Arubus, ta resorta directamente bou Minister Chris Romero.
Mester menciona cu e Lider Honorario di MEP, Nelson Orlando Oduber, no a keda contento cu tur e criticanan cu el a ricibi. E ta culpa AVP pa ta hunga cu su integridad y cu ta instiga contra dje. E ya exigi pa tur hende, incluyendo opositornan politico, pa publicamente pidi’e despensa y corigi e critica riba nepotismo. Oduber mes a critica tur otro miembro den Hunta di Directiva den e Gobierno anterior, pero awor no ta aprecia cu ta considera su nombracion como “Friends & Family”.
Den un declaracion na radio, el a corda tur hende cu el a funda Setar y el a funda Aruba Ports Authority, pues ta uza su experticio di 36 aña den politica na beneficio di e compania estatal. E ta lamenta cu ta critica, lubidando e aporte cu e por nifica pa e compania.
Tocante cu e ta cobra 6 pensioen caba, el a desmenti categoricamente. El a bisa por ehempel cu e no tin ningun pensioen di Antias, aunke otro politiconan si tin esey te awe. Locual si e ta cobrando ta pensioen di biehes di SVb, Pensioen di Parlamento di Aruba y Pensioen di Minister. Pues no 6 pensioen manera ta bisa di dje, sino 3 pensioen. Pues e salario adicional di Afl. 3600 pa luna ta bin riba e 3 pensioennan ya meniona.
Nel Oduber ta e prome Minister President di Aruba pa tuma un funcion banda di su pensioennan, den Gobierno. Ni Henny Eman ni Mike Eman a haci esaki.
