Esaki ta di 7 aña cu ta organisando e proyecto di Aruba Doet y diabierna el a inicia un biaha mas, unda cu tin mas di 186 proyecto pa henter e fin di siman aki. Tin mas di 3750 boluntario y 167 organisacion social unico.
Yen di proyecto di Boca Grandi te cu Alto Vista y completamente rond di Aruba. E organisadonan di Aruba Doet ta hopi contento cu esaki.
A cuminsa algun siman pasa y pa mira cua organisacion nan por a scoge p’e grand opening. Segun Thixianne Wever, nan a yega na Stichting Casa Cuna Progreso. Esey tabata un decision hopi bon, pasobra tin hopi boluntario cu ta trahando desde mainta trempan. Esaki tabata un luga hopi agradabel pa por a ricibi Gobernador.
Stephany Phelipa a expresa cu pa nan e reconocemento di e trabou di boluntarionan tabata importante, pa reconoce e importancia di trabou boluntario pa comunidad. Tur aña cu Aruba Doet ta haya net un momento perfecto pa un organisacion social haya hende bini y cla pa traha mita dia of ful un dia pa duna un man pa yuda e organisacion social. Asina aki ta yuda e organisacion haci algo social cu ta den e beneficio di e grupo meta.
Ainda tin algun proyecto cu mester di boluntario y e ta un poco mas di 200. Mayoria proyecto tin algun boluntario caba pero si ainda tin personanan kier duna un man por bay riba e website www.arubadoet.com of yama na 5827666 y e organisadonan por yuda scoge un proyecto. E ta facil pa participa, unda cu ta simplemente busca e proyectonan cu ta habri y inscribi pasobra diasabra ta e ultimo dia.
CEDE Aruba ta contento cu e proyecto di Aruba Doet. Segun Daniel Tecklenborg, nan tin hopi compania ta trahando cu nan e fin di siman aki y hopi boluntario. Tin 186 proyecto cu boluntarionan lo ta realisando. A bishita Casa Cuna hunto cu Gobernador y tur aña e kabinet ta cu nan. Nan tambe ta fiel creyente den Aruba Doet. Ta gradici Oranje Fonds tambe pa nan cooperacion invertiendo mas di 1.5 miyon den proyectonan di Aruba Doet. Esey ta un relacion di partnership cu lo continua cun’e y Aruba Doet ta orguyoso di esaki.
E cantidad di boluntario di e aña aki ta un tiki menos cu aña pasa, pero a dicidi cu e biaha aki ta enfoca riba calidad no cantidad. Kier mira cu ta termina tur proyecto y tambe pa tin mas actividad social den Aruba Doet. Segun Daniel Tecklenborg, Aruba Doet ta conoci pa trabounan di drecha cos, verf, traha banki, traha gazebo. E aña aki kier a mira mas actividad social pa saca hende afo for di isolacion, hendenan for di circunstancianan manera hende no a sali pa basta tempo for di cas di anciano y haci algo cu nan. Esey ta loke cu kier mira mas den Aruba Doet y ta logrando esaki.
