E area banda di Costa Linda, La Quinta/Screaming Eagle, ta un area cu pa hopi tempo a bira notorio cu ora turistanan bay disfruta di nos beachnan, antisocialnan ta probecha e momento eynan pa bay cu tur nan pertenencianan.
No ta mucho dia pasa algun turista a wordo horta pa hendenan sin escrupulo, causando asina daño na nos pilar mas importante. Awe atrobe ta e caso. Algun turista cu a bin Aruba riba crucero, a dicidi cu nan ta bay disfruta di nos beachnan precisamente den e mesun area aki. Pero lamentablemente ora cu nan a bolbe, tur nan tas, cu placa, camara, paspoort a somenta. Esaki sigur ta pone un mancha scur pa loke ta e sector aki.
E turistanan a wordo atendi polis diligentemente y sigur nan lo bay haci denuncia di nan propiedad perdi. Nan ta preocupa con nan lo bay sigui cu nan vakantie. E daño a wordo haci caba. En bes di yama atencion pa mas turista bin Aruba, hendenan malbado ta percura pa e turistanan duna nos un mal propaganda, pasobra nan a wordo horta.
Si mira bon, ta net e strip aki ladronnan ta opera y den rapportnan di polis ta indica cada biaha e mesun spot. Esaki sigur ta un redflag unda cu polis por pone vigilancia y mira kendenan por ta responsabel pa e hecho mahos aki, cu ta afecta nos turismo.
