Mas cu un circo: Muchanan a gosa di un dia maraviyoso di actividad

Iglesia El Camino tabata tin un evento hopi dibertido. Un evento pa muchanan di tur edad. Jessy Grandviel-Ansano, casa di pastoor di Iglesia El Camino y tambe ta traha cu mucha, hoben y hende grande ya pa 30 aña na Aruba, a conta cu a haya contacto cu un otro organisacion internacional cu yama OCC (Operation Christmas Child) y nan idea ta pa haci muchanan contento, dunando nan regalo, pero tambe conta nan di Hesus y duna nan un “hou vast” den nan bida.

E idea

Nan a bin cu e idea cu ta haci un fiesta pa mucha y hunto cu esey ta logra e meta menciona. A pensa semper cu tin mucha cu tin manera pa bay un fiesta, pero otronan no. E ora a bin cu e idea pa haci un fiesta grandi na Aruba, den cercania di Savaneta y Pos Chikito, specialmente dedica na muchanan di menos recurso, pero tur mucha ta invita.

Nan tabata tin 155 mucha riba lista pa nan haci contento. A dicidi di keda te ey pasobra no tabata tin luga pa mas.

Actividad

Karen Mademillia ta encarga cu entretenimento pa loke ta e evento grandi di Iglesia El Camino. E ta conta cu nan a cuminsa for di aña pasa, caminda cu nan a sinta brainstorm. Riba un diadomingo mainta nan tabata sinta y a bira wak juffrouw Jessy y a bis’e cu lo haci circo. Su sonrisa a bis’e cu lo bay haci un circo y for di eynan e circo a cuminsa.

E actividadnan a encera weganan parti pafo, cu carousel. No a bin cu Dino Jump, pasobra e no ta cuadra den un circo.

Tabata tin entre otro pintamento di cara, por a saca potret, tin hendenan ta cana rond sacando potret di e muchanan cu un camara di polaroid, cual idea tabata hopi leuk, caminda cu por haya e potret di biaha y bay cas cun’e. Tabata tin ponemento di nanishi na payaso su cara. Tin blekinan cu por tira, p’asina por gana premio y no por a falta e famoso wega den circo, esta e roulette.  Asina tabata tin diferente tipo di wega cu por a hunga den e circo aki.

Fundacion Desaroyo Comunitario

Melitza Peña ta secretaria di Fundacion Desaroyo Comunitario, cu ta situa na Pos Chikito. E fundacion ta pa yuda e personanan mas vulnerabel den nos comunidad. Tanto pa mucha, hoben como esnan grandinan. Ta yuda nan den nan desaroyo completo, segun Peña, pues den den curpa y alma.

Segun Peña, e idea a cuminsa for di aña pasa y na januari a cuminsa reuni mas frecuentemente pa forma grupo, forma e comisionnan pa bin cu e idea pa concretisa e proyecto.  E circo no ta un circo di e Iglesia so. Ta tres organisacion ta trahando hunto, esta Fundacion Desaroyo Comunitario, Iglesia Evangelico El Camino y Operation Christmas Child. Esaki tabata e comienso. Despues di esaki e ta sigui y na december, dia 8 e lo clausura. Ta algo cu ta manera un desaroyo. Algo cu tin cu sigui pa e muchanan.

Mas cu un circo

Nomber di e fiesta aki “Mas cu un Circo: Fiesta di regalo”. Esey ta nifica cu e ta un circo berdad, pero ta un fiesta di regalo. E muchanan no ta paga pa e regalo. E ta algo gratis. Tin hopi mucha, principalmente  den bisindario di Pos Chikito, cu ta di menos recurso. Nunca por ta nan no a bay un fiesta y nunca nan no ta ricibi algo por nada. Pa esaki ningun mayor no mester a paga pa entrada, ni pa cuminda, ni pa tur e regalonan cu nan a haya pa tur e actividadnan cu tin den e circo. Despues di esaki, ora cu tur e actividadnan aki caba, e ora ey tin e presentacion mes, esta e programa di e circo, caminda cu e muchanan ta bay paden. E ora ey ta haya e parti caminda cu e otro partner, esta Operation Christmas Child, ta haci su actividad.

Aki e muchanan ta ricibi e regalo di mas grandi. E regalo mas grandi ta pa nan por conoce nan amigo Hesus.

Feedback

Segun Peña, e feedback tabata hopi bon te asina leu. Nan ta masha contento con e circo a bay. Tin di remarca cu hopi mucha a wordo invita, ya cu a acerca tur scol den vecindario. Mester a inscribi pa por tin informacion di e mucha y asina prepara pa e mucha pa por bay cerca un lider y despues pa por ricibi e regalo tambe cu OCC tabata tin pa cada un di e muchanan cu tabata t’ey presente na e circo.

Gratitud

Fundacion Desaroyo Comunitario ta gradici tur sponsor di curason. Tur esnan cu a ricibi e carta y a keda toca, pa asina haci e evento un exito. Ta trata di mas di 100 mucha cu a gosa, pasando dushi. E gratitud ta bay na nan. Asina mes cu nan no tabata tin coriente, no tabata motibo pa e fiesta para.  Tur sponsor a wordo duna di bon curason y Señor ta multiplica tur. Gradicimento ta bin di tur tres organisacion, Iglesia El Camino, Operation Christmas Child.

Comments

comments