Mas cu 80 kilo di cocaina scondi den Martinair

Na aeropuerto internacional di Ezeiza, cerca di Buenos Aires na Argentina, a bin descubri durante un accion di Duana ochenta kilo di cocaina den un area di e avion di carga di Martinair, cu ta opera for di Air France-KLM. Esaki a keda informa pa prensa local. E tres Pilotonan di e nave y cuatro personal di groundhandling di aeropuerto a keda deteni.

E vuelo MP 6912 pa 1’or di merdia tabata na punto di lanta vuelo na Aeropuerto Internacional Ministro Pistarini. E nave mester a bula pa Quito, Ecuador, y despues sigui pa Amsterdam. Un dia prome e vuelo a yega for di Amsterdam, despues di un parada na São Paulo, Brasil.

Mas cu 50 funcionario y cinco cacho anti-droga a participa den e accion aki bou di guia di Hues Javier López Biscayart. Nan a descubri e droga, scondi entre palletnan hunto cu otro carga, e ,as cu 80 pakinan di cocaina y cada un tabata pisa mas o menos un kilo.

Detenidonan ta wordo interoga y husticia di Argentina ta trata di saca afo si e droga a wordo hinca na Ezeiza of a yega abordo caba na Brasil.

Un vocero di KLM a confirma cu autoridadnan Argentino ta haciendo un investigacion riba operacion di Martinair Cargo. “Durante e investigacion ey, nos no por duna mas comentario.”